Zuunni Zogam

Aw !!! Kong it Zomi pih te,

Lam et ngam loh leh up ngam loh phial zahdong ding in,Zomi te Pasian in hong lamsang ahihman in Pasian min thang masa hen.

USA gam sung tung Zomi te, unau khat bang in, kipawl na khat sung ah omkhawm thei liailiai in, mapang khawm thei ihhih man zong kei mimal in lungdam na koko ing.

State pawl khat te ah, Zomi social lam leh Zomi religion akhentel thei nai mahmah lo omlai a,Minam thu leh Pasian thu ameh khawm theilo pawl khat omlai ahihman in tua te ading thunget sak ni.

Biakna ( religion ) thu ah, bang biakna pawlpi sung ah ih om zong in, ihbiak Pasian khat , ih tun nopna Vantung gam zong khat, Jesu zong khat bek mah aum te ihhihman in,ih ukna lampi tek zuihding hikasa hi.

Minam thu leuleu ah, kipumkhatna ( Unity ) ding thupi ka sa hi. Min tawh buai masak ding hilo mah a, ahizong kipum khat theihna ding ahihnak leh ei cih sese hong ki zuihnop kei leh nuakding, langpan ding cihte sang in, kipawlkhop na ataizai nading in, pawlbawl kawm panpih kawm in, thu hoih ihsak te sunglut in sungkhia zel leng ih minam khangto in ih sepnop maban te tangtung ding in ka lam en mahmah hi.

Mi tawh kipawl thei lo, ama thu bek thusa , cih zong uthuai hetlo ahihman in, tuabang lungsimnei mimal te in, ( kei mahmah akipan ) kikhel in, ih mipih te tawh kipawlkhawm thu vaihawm khawm, nasem khawm in ih omtheihna ding ih lungsim te khiamzek leng hoih ka sa hi.

Hong tungding Zomi Community USA 2010 ( Zomi Innkuan USA ) kum 5 bang hong cinna pawipi, Columbus,OH khuapi ah tungding cih thu leitung bup in, za in, tuasung ah Zomi te kipumkhatna ki itna khang ding cih zong lametna lianpi ki nei tek ding in ka lam en hi.

State tuamtuam ah ih om hang in, Zomi ihhihna kibang in, kipawlna ( Organization ) tuamtuam tawh min ih puak hang in,ih sisan kibang veve ahihman in, Zomi sung ah, ( black & white ) omlo cih thu,minam makai te in hong naciapteh sak un. Kipawlna khat peuhpeuh abeimang sak nuam mi te pen amau leh amau thanemna lungsim virus nei khat in ciapteh lel ding leh Pasian kiang ah thungetsak ding in ka mipih Zomi te kong zawn hi.

Zomi te ading Vision khat ka mu khol a,mai hong paiding kum 13 kikal sung in, USA aom Zomi virus pawl khat hong om nawnlo ding a, khangthak momno te in, thuki tuak in minam thu lam ah hong hat mahmah in, sim leh hmar, sak leh khang akitheh thang Zomi te Gam khat in honggawm khawm kik ding in ka mukhol hi. Tulaitak tuallai khangno te ngaihsut nate, uham sa pawlkhat khuak in, ban zolo ahihman in amau tutmun taptawng pan phunphun thei lai mawk hi.Khang lui ngaihsutna leh khangthak ngaihsutna te kibang thei mahmah lo ahihman in,hunkhat akikhel ding hong kisam mahmah lai hi. President Obama genden mah bang in, Change ! Change !! Change !!! hun hong tung ding in ka mu khol hi.

Kei mimal feel na kong at te nong simsak man in,ka lungdam hi.

Zomi khawmpi Columbus ah hun lem ngah leh sakding in, ka phuak la, athu na simsak un…..

Zuunni Zogam

Pupa luahsa Zogam lei

Lobang tulding ka phal lo

Sak leh khang, sim leh hmar om

Zota te tuibang ki gawm ni

Cho

Zuunni Zogam

Tuan a pupa luahsa Zogam lei

Lia leh tang aw, Hanlung ciam ve ni

Khangthak Zomi, minam khat, gam khat in ding diing

Sim leitung ah gualtung ih tuang ding hi.

Ih teenna mual kidang in

Pau leh ham ki dang mah leh

Sisan khat nam khat hihang

Unau laigui zom hi hang..

Lungdam sawnsawn ei…