Sunday, May 29, 2011

Pau leh Ham Part -3

Tg. Letpau >>> Damdam maw Lia Neihsiam?
Lia.Neih Siam>>> Topa huhna tawh damzeel dam ing ei… Nang ee??

Tg. Nangma vangtawh dam ing ei..Nang tusun teng bang semsem na hia?? Nets sungah lah hongdawk mahmah lo a…??

Lia. Nasep kician dang omsam kei in, ahizong’ company ah kasep kawm in Zo minam te khang tangthu ka kawi kankan laitak hi ei..Nang ee???Na nasep ahoihhoih mah hia???

Tg. Hoih lel ei.. Ahizong nang cihtaknak in,Zomi leh Zo minam cihvai keizong ka kankan laitak himah ei….Kikum toto leng hilo dia??

Lia. Ai ve maw!!!!Tua nang mimal muhna sanna ah Zomi leh Zo mi akilamdan na bangcih khenkhiat mah na hia??

Tg. Khenkhiat theih cihbel hikei in, ahizong asiangtak in ih muhkhiat theih ding in, Zo ihcihpen Ihpianna generation min hi a, Tua Pu ZO pan hong piangkhia te ZOMI ( Zo people ) cihdan in ciantak inkilangh sa ing.

Lia. Aw !!! Lungdam mahmah ei U Tg aw.. tuahang hiding aive!!!! Zomi te teenna pen Zogam, Ihlai zatpen Zolai, Ih annek pen Zo An, Ih ngeinate pen Zongeina, Ih pau ihham pen Zoham Zopau anacih uh telsan ing ei..
Tua leh U Tg aw!!!, Lushei gamah Duhlian, Lai,Falam gamah Laizo, Ngawn,Lumbang, Taisun cihte leh Lamka gamlam aa om, Vaiphei,Zou, Hmar,Simte,Thahdo, Gangte cihte pen aminam min uh maw, ahikei leh Zo minam temah maw.., apau leh ahaam uhtawh kituak a, amin akivawh maw…Nong telgen thei laitam????

Tg. Zomi ihcih sungah paunam tuamtuam tethu leh, omna teenna munlehmual hang a, ih min kivawhna te tawhkisai in, hong genthei lua zen ning ei….den aa,atung ah nagen minteng pen Pu Zo khangpan hongpai khia mite vive hi.Ahizong in, Pu Zo tapa min,ata pa ih tapa min cihbang in,kuamah in khangthu laikingelh nasung ah akiciantak in, a atkhiathei leh Pu Zo bangkum pawl in suak a, bang hunpawl pan kipan ZO min kilanghkhia cih kuamah in theizonai louh hi.Banghang hiam cih leh nidang in laikician ciaptehna kinei nailo ahihman in upmawhna leh Shan minam khangtangthu ( Pong Kingdom AD 80 – 1474 ) laibu te pan pawlkhat, Sengam ah Zhou Dynasty (http://en.wikipedia .org/wiki/ Zhou_Dynasty) sungte ah ihet kik ciangin, Zo , Yo. Yaw, Yao, Zho, Zhou, Zaw , Sho etc:- cihbang in kimu thei ahihman in, ZO cih kammal pen Mihing khat min ahihlam kisiangmuh mahmah thei aive..

Lia. Aw hi maw!!! Tua leh Lushei gam aom miZO te zong ih pupi ZO min mah lasuk uh aive maw..

Tg. Hi buang ee..Adiakdiak in Lushei gam ateeng te in, ZO min alak na uhpen, Pu ZO suanlehkhak te kahi uh cihna aive…

Lia. Aw hizaw maw…Tua leh minam khat ih hive mate… Tua leh katel loh ah, Hlakha Zou acih te e leh, bangcidan a hia???

Tg. Mualtung khuavotna gam ah aten man un, Hlakha Zou a kici ai ve…A mau paulehham hang a Zou kici hilo in, ateenna mun tawh kisai hizaw hi…Gtn:. Nang bangbeh nahia???
Lia. Keimaw Ka Pa Gualnam beh kanu Naulak beh hi a, keibel Gualnam beh hi ing..Ka pa lam azui kai ve..

Tg. Aw !! tualeh nang tun Mualbem khua ah piang cileng Teizang kam na zatding ai vemaw.. Azenzen in Thuklai khua ah piang hile cin, Sihzang kam na zat ding cihdan e maw…Ih khankhiatna kammal pen Zo pau sung ah namkhat hilel in, awkaih kibanglodeuh cihman bek hi a, tua pen minam kam or Pau nasak leh khialding nai ve lawm….

Lia. Kalaisai himawk mah ei…Tun teltaktak ta ing ei..ken nidang a, Teizang mi, Sihzang mi, Saizangmi, Khuanomi, thado mi etc: cihdan a omsa e, nong telgen ciangh Zo minam ( Zo people ) te himawk hang ei..Ih ten muntawh kisai bek a, kamzat asuktuah akahto apheitaai cih te bek a om ai ve mate…

Tg. Hilua ei..Keibang Ka Pa Samte beh hiin, keipen Sihzang lak ah khangkhia ka hihman in,Sihzangkam nuamsa ing..Ka Nu bel Naulak beh hi in, ka Nu in zong sihzang kam mah nuamsa zaw lai..Ka Nu tebang Dimlo khua pan hi in, ataktak in Dim kam tawh apau ding hi ven, ih teenna mun tawh akisaizaw na hizawmawk ai ve….Tua bek hilo, ka paneu bang Samtal khua ah teeng e maw, Thahdo kam nuamsa za pah aive…Ka cihnopna ah ih teenna munmun te kam kizang a, tuapen minam ihsak lohding ka cihna hilel ee..

Lia. Telsiam lua ta ing…Beh khempeuh bang abulteek in kankan lehang Ciimnuai pan aki paikhia vive hituak sa mawk ing ei..

Tg. Hilua kisa ei lawm, gentehna tulaitak Zou kam azangh tebang Ciimnuai khuapan in, Pu Hang Hil makai a, Pu Tung Nung, Pu Lian Zaw, Pu Tai Thul, Pu Tung Dim leh Pu Neu Zaw tepan hong kipankhia hi ven…

Lia. Aw hi maw!! Lungdam tak ei..

Tg. Tua hi in, Thado te Guite behte bang akhangthu uh enkik leng, Ciimnuai pan Pu Song Thu suan ahi Thado gamluah Aisan gui, Pu Sek Thah suanpan hongpiang hi a, Pu Ni Gui tapa upen Pu Gui Te leh anau Pu Ni Vang hi in, Pu Gui Te suanlehkak teng Gui Te beh puasuak a, Pu Ni Vang in tapa thum nei a, Pu Mun Luah, Pu Zil Om leh PU Nau Lak te cihbang in akhang na paisuk uh hi. Ih et kikkik ciangin, Ciimnuai pan hongpiang khia vive hi a, Zo cihkammal pen kei ahi, ko ahi acithei tuan kuamah omlo in, ei te piankhiatna ih Pu Zo hi cihciangbek siangtak in ki sui kikthei hi..

Lia.. lungdam sawnsawn ei.Ka theihloh thu tampitak hong telsak nahihman in, ka lungdam mahmah ei..Tua nong genteng ka khua uh a, khanglui putek thuthei te nadong kikning maw….Eiii!!! cih dihdih ihkiho nuam in, ka nasep paihun leuleu tain, zing nitakteh zomkik ni ei maw…Lundam mahmah..

Tg..See u….

Ehhhh na khawlpak KHUL la pi na ngai aw…!!

(a) Eiteng khawlkhawm atuam omlo
Vannuai cipeuh KHUL pan apiang,
Tuunsung khat pan piang hi ngeingei e..

(b) Tuunsung khatpan piang hi ngei ngeei,
Sanggam suahpih laigui zawng,
Khawm hi ngeingei e”.


Tg. Zogam Mungno

Thangho leh Liando

NauLak beh leh Thangho thu atelcian nuam te ading in hih anuai ah hong hawmsawn ing.NauLak beh laibupi sung pan kong hawpsawn hi.

Naulak beh te Tual phuisam nasung ah " Ciimnuai, Geeltui, Khuangen, Sasih, Dimpi, Kalzang" cih min lo in kipan hi.

Thangho leh Liando te neulai tangthu ih theihsa ahihman in kong at nawnkei ding a, A tenna uh Ciimnuai pan Geeltui, Dimpi ah teng in,asih ciang in, alutang uh Dimpi khua Naulak te hanken ah ki vui hi..( hih Thangho leh Liando lutang te pen ciingtawh ki gan bikbek a, sakol lu ciacia pha hi ci-in, ka pianna Nu in Dim Han suang kuahawmvang sung ah aneulai in lut in, amitmuh hong gen den hi..Ka Nu damlai a, Pyidawtha Ka inn uh ah omlai hi...A ut peuh in dottheih lai hi.)

Thangho pen zi neilo in si a,Liando in zi nei in, azi min Neihtong( Neihchong ) kici hi.Liando in Daal ( Dak ) lamdang khat nei a, Vanleng khua ah Sial 30 tawh zuak kici hi. Lailen khua te’n Sial adeihngawh man in Liando na that uh hi. Liando asih ciang in Naulak te’n alutang la in, Dimpi han ah a U Thangho mahtawh akibang in vui khawm hi.Thangho leh Liando gamh teng NauLak te’n tom in,a taakdo ding in la uh hi.

Thangho leh Liando la akici dawng 20 te tuni dong in Naulak te’n, Songla ( Ton lapi) in neilai hi. Thangho leh Liando pan apiang Sumtawng Thoihna zong NauLak te’n zang suaksuak hi. Geeltui khua masa pen, tulai tak Dimpi leh Suangpi khua kikal sialtang lui neklam ah om ahihi.

Tangthu sung ah Thangho leh Liando in “ A gamh a go te lei ah phum” cih thutawh kisai in, Suangpi khuami khat in tua vangil phumna mukha ngei ci’h Cap; Ngul Za Thang in gen ngei hi.

“ Ciimnuai A Sa Kibaak, Geeltui Ah Kithuk “

Thangho leh Liando Ciimnuai ah ateenlai un, tangah lubawk in genthei mahmah uh a ,nuntak hamsa sa mahmah uh hi. Tua hun in A Ni bek in it a, amau unau ait kuamah omlo hi.Khat vei akhua sung ah Sialpi khat ki go a, amau Unau zong sa kingawhna kiang khawng ah adakdak uh leh sa semsem papi khat in, Sial khe guh khat sattan in “No Unau hih ciahpih unla huan un” ci-in apia hi. Amau Unau zong nuam mahmah uh a, ciahpah in, saguh ahuan pah lingling uh hi.

Thangho leh Liando Ciimnuai pan Geeltui hong lal ciang in,hong Hau pha mahmah uh a, aneulai a Saguh apia pa phawk kik in sam uh hi. An alim theithei huan in, sagawh in Zu leh sa tawh zin do uh hi.

Liando in azi kiang ah. “ A sa hong piak saguk bawk hi, “ A tak nemnem na pia aw NeihTong aw” ci-in, an limtak pia in, lungdam kohna ( Thanks Giving ) na bawl hi. Tua ahihman in thu ciin in, tuni dong in tua kammal ki nei lai hi...

Thangho leh Liando Geeltui ah hong nopsak ciang in La naphuak uh a;

a.* Ka Tun nu’n kuangpi hong khup e,

Nuai a muan lei suak ta ding aw e,

b.* Nuai a muan lei suak ta ding aw e,

Ni nu’n dal gua bang hong hah ta e,

a.* Ni nu in dal gua bang a hah hi e,

Geeltui ah Ni bang ka lun hi e,

b.* Geeltui kamkei sa vungvung e,

Khuathang vaipi ( phuipi ) a pal bang ka nan aw......

Hih atung Thangho leh Liando te tangthu leh Naulak te kizopna tawm kong at hi a, theihbeh nop aom lai leh ki kup tohtoh ding in, hoih kasa mahmah hi.

Tg. Zogam Mungno

Saturday, May 28, 2011

Zogam apiang

Zogam pan apiang Zomi laizom te,


Zogam pan apiang Zopuan ka silh a ka lungkim in kilawm ka kisa khiukheu hi.

Zogam pan apiang Zoan ka ne a, lim ka sa bal mahmah hi.( Adiakdiak in vaimim,baal,Nga,Kaithum)

Zogam pan apiang Zozu mah khum zungzung in,tha dim ka sa nihniah hi.

Zogam pan apiang Zolia te mah amel hoihdiak in,Zotaang te tawh lungkituak phadiak citciat se hi.

Zogam pan apiang Zoaktui mah sial dawn zoleng tha om kasa sese hi.

Zogam pan apiang Zolai mah tawh laiat laisim leng muibutna ka nei piannong hi.

Zogam pan apiang Zopau mah tawh pau ciatciat leng ka lungkim khinkhian se hi.

Zogam pan apiang Zodamtui mah siangtho in lim kasa ngaungau hi.

Zogam pan apiang Zohuihkhi mah huih khempeuh lakpan siangtho pen in cidam huai kasa citciat hi.

Zogam pan apiang Zosial sa mah lim ka sa penpen hi.

Zogam pan apiang Zovok mah limci kasa nihniah hi.

Zogam pan apiang Zothau mah agin ngaihpha kasa dingdeng diak se hi.

Zogam pan apiang Zovaphual te kiitna mah thupi kasa penpen hi.

Zogam pan apiang Zomi te mah pau leh ham tawh buai kasa bilbel hi.

Zogam pan apiang Zota te mah makai peuh utphadiak kasa khelkhel hi.

Zogam pan apiang Zola te mah lakam tawh kidim in ngaih kasa diak zungzung hi.

Zogam pan apiang Zogalkap te mah hangsan in galdo siam kasa mahmah hi.

Zogam pan apiang Zomi Pastor te mah pawl phuatthak siam kasa citciat hi.

Zogam pan apiang Zoheisa pak mah etlawm kasa phadiak hi.

Zogam pan apiang Zobualtui Lih li mah lamdang kasa penpen hi.

Zogam pan apiang Zobuk mah lamdang sa in etlawm kasa citciat hi.

Zogam pan aping Zongeina te mah thupi pen ka sa bilbel hi.

Zogam pan apiang Zovontawi te mah ciim kasa a,pilzong kasa diak se hi.

Zogam pan apiang Zomi Namni mah thupi kasa diak mahmah hi.

Zogam pan apiang Zomi National Congress party mah minam ading sem kasa penpen hi.

Zogam pan apiang Zomi Re-unification Organization te mah,minam ading luangkham kasa sediak hi.

Zogam pan apiang Zomi te mah pil kasa pha diak se hi.

Zogam pan apiang Zomi te mah kithutuak na lam ah nang kasa pen hi.

Zogam pan apiang MIHING khempeuh ZOMI hihna leitung munkhempeuh ah thang tawntung ta hen..

Zogam pan apiang ZOMI khat ka hihna tawh,

--
Tg.Zogam Mungno ( Patriot Fighter )

Tuesday, May 24, 2011

Pau leh Ham awkaih Part - 2

Dear It Zomi te,

Pak huan sungah pak mel namkhat bek tawh kizem mawk leh etlawm lo a, lim leh mel tuamtuam anei Pak huan hi leh mittawh et in etlawm a, asung ah vak in tawlnga leng ih lungnuam se hi. Zogam ah zong khua khat leh khua khat ih pau kibang ki telsiam thei na pi in, ih awsuah akaihdan kibang lo in, zaknop phadiak se hi..Pawl khat te in kai sukpian, pawl khat in kai khollo in,hi pian bauhbauh se hi.

Tua awkaih tuamtuam tawh akidim Zogam ah nuam ihsa lualiang a,ih khua awsuah (awkaih) te peuh minam min peuh ihsa kha thei zanzan mawk hi.Bang hang hiam cih leh pawl khat te awsuah ( awkaih ) akibang khua 6 - 7 bang aom khin te pawlbang, ih awsuah kibang ahihciang ei awsuah akibang teng minam khat hihang a ci kha zong kiom theikha in ka lam en hi.Bangbang in ih ngaihsun zong in Zogam ah ateng teng laigui kizom unau laizom te ih hi a, sungkhat( sulkhat ) apiang Zomi te ih hihi.

Et theih pak ding in, hih anuai a te, hoih tak ngaihsun kawm in hi le hang minam khat ih hihna, sul khat piang ihhihna kician mahmah a,ih tenna khua pau awsuah ( awkaih) pen ih khua mun ah ihzat a hih lelna ki lang hi..Minam pen Zomi ih hi a, awsuah leh awkaih in minam hi ngeilo ahihna ki lang mahmah hi.

Nau Lak beh khempeuh Dim awsuah ( awkaih ) zang kimlo hi...Pawl khat in, khuano awsuah, Teizang awsuah, Paite awsuah,Ngawn awsuah, Lusei awsuah,Zou awsuah, Saizang awsuah in, ih tenna khua leh ih lamkiatna khua dungzui in ih awsuah kizui ahihi... Bangbang awsuah ih zangzong in, Nau Lak beh khempeuh apianna khat pan ahi a, Pu Naulak zong Zomi ahihi.

Tua mahbang in,gentehna in, en suk leng.....

Suk Te beh khempeuh Teizang awsuah khinlo hi.
Gual Nam beh khempeuh Saizang awsuah khinlo hi.
Sam Te , Mi Lun, Tai Thul, Man Tuang, Man Lun beh khempeuh Zo( Zou) awsuah khinlo hi.
Suan Tak beh khempeuh Sihzang awsuah khinlo hi.
Gui Te beh khempeuh Vangteh awsuah khinlo hi.

Hih atung a Beh teng bek en le hang zong, ih Zogam ah ih tenna khua leh mun leh mual tawh kituak in ih awsuah luanzia akibang lo ahihi.Awsuah ( aw kaih ) kibat lohhang in ih Zo Ngeina lapi te, ih lakam te pen Lusei, Thahdo, Pawi te mahtawh avek in akibang ahihman in, ih pianna PU khat minam khat unau laigui zom khat ih hihi.

Awsuah ( awkaih ) tuamtuam ihzang phial zong in, minam khat ihhihna bang teng in hong telsak in, hong paikhia theilo hiam ci'h ensuk kik ni. >>>>>>>

Hih anuai a kammal te pen, bangbang awsuah ( awkaih ) ihzang zong leh ih tenna ih lamkiatna mun mual akibang kei phial zong in, tuni dong ciang akizang den kammal leh awsuah te ahihi.

Vok, Ak ( Ar - Al ), Bawng, Sial, Sai, Keel , Ni leh Kha ( Tha ), Aksi ( Alsi - Star ), Nu leh Pa, Pi leh Pu, U leh Nau, Ci ( meh lak a sawh ), Tui ( dawntui ) La ( hla - Song ) , Guah ( Vuah ) . Pasian ( Pathian ) , Um leh Bel , Lum leh Tei, Khuang, Dak ( Dal ) , Lih ( Rih ) bual , Mual ( Tang- Tlang )... cihbang dan nengneng teng.....

Ih lamkiatna ih pianna ih khua ciat ah ih zat pau awsuah awkaih te pen pianpih bilsungkhum awkaih te hilel a, Zogam a piang ih hihman in Zomi te ih hihi.Zomi Zogam neusek lo in, bangcibang in asuakta gamkhat in leitung ah ki omthei ding hiam ci'h, tupna leh kithutuahna ih neih kimciat ding kong hanthawn hi..

Zomi Zogam ading... Mapang khawm ni...

--
Tg.Zogam Mungno ( Patriot Fighter )

Pau leh Ham awkaih Part - 1

Dear Zomi sanggam te,

Mihing khat in ihpian tung in ihkhua bek mah khua aom ding kisa kha thei hi. Tua mahbang in ih pau bek mah mikhempeuh in thei kimding in ki ummawh lai hi.Tua bang ...... nengneng thute pan in, ki khangtoto a, khua ki mumu in, muntuamtuam gam tuam ah ih zin suk zintoh theih khit teh leitung pen azai mahmah leh minam leh pau awsuah nam atam mahmah ahilam ki mukhia hi.

Kei leh minam tuamtuam te pau ( aw suah )

Ka pianna Nu leh Pa Laibung khuami hi in, Khuano awsuah ciktak a zang khia ahihman in, khuano awsuah ka siam phadiak se hi.Ka lamkiatna pyidawtha khua ahihman in,khamtung pan hong lal suk pau awsuah namkim kingawmna hi a, Zomi awsuah khempeuh kisuktuahna ahihman in pyidawtha Zopau kasiam mahmah leuleu hi.Phawh se hia???

Ka neu a kipan kasangkah pih te Teizang awsuah zangh vive ahihman in Teizang awsuah amau mah tawh ka kibang lel hi.Ka inn veng te, Tuitawh, Kaptel, Tauleng, ,Zangtui, Mualbem, Muizawl, Dimlo, Laitui, Keeizang, Muallum, Thalmual, Vangteh cihbang in khuanam kim pan vengkhat in omkha ka hihman in amau awsuah ciat kizaza den a ki siam pah lel hi.Ka khua veng teng ah Ngawn khua thum om ahihman in Ngawn pau zong ka siam pah lel hi.

Kum 13 ka phak in Aizawl ah kazin a, Lusei( miZo ) pau kha 2 sung in ka pau thei pah hi.Kum 15 kaphak ciang in, Myaungmya ah sang ka kahsuk a,Kawl pau kizang ahihman in, Kawl pau kasiam pah hi.Kasangkah pih te Dekte ( Karen ) leh Behte ( Kachin ) te tawh lumkhawm kahihman in amau pau zong annek nakhop ka thei hi.Kum 16 ka phak in Kachin gam ka zin ciang in, Kachin pau ka sin teng kizanghthei pah ahihman in noptuam na tampi ka nei hi. Kum 17 ka phak ciang in, Shan Gam Maishow (Mongshu ) ah ka zin a, Shan, Wah, Sen tetawh kikhawl ka hihman in, Shan pau, Wah Pau, Sen pau tawh zawlthu gentheih khop na ding ka thei hi.

Kum 22 ka phak ciang in ZRO ka join a, minam naseppih te Paite, Vaiphei, Simte, Zou, Gangte, Hmar, Thahdo( Kuki ) te tawh kikhawl in , anne khawm tui dawn khawm ka hihman in amau awsuah bang in ka pau thei hi.

Kum 26 ka phakciang in,Thailand Bangkok ah Refugee in kum 3 sung ka omsung in Thai pau ka siam mahmah lel hi ( Sawadeekrap ) .Kum 29 kaphak ciang in, USA ka tung a, Mangpau ka sinsin leh siam ka kisa mahmah a, mikang te bang ka hopih leh awsuah man lua ahihman in tello kik liang uh hi. Pawl khatte in Red Indian te na hiam bang hong cidektak liang uh hi.

Ka cihnopna ah Ih pianpih awsuah pau mangngilh lo in, Mi namdang te pau awsuah zong ih siam theih zahzah in sin in, ih siamsawm ding thupi ka sa hi.Kei pianna awsuah Khuano pau ciktak tawh hong kihopih leh ka dipngek hong vutsuk in ka lungnuam phadiak se hi. Tua mahbang in namdang te in zong amau pau ciktak tawh hopih thei in hi leng hong it mahmah ding a, nasep na ahizong, nuntak zonna tuamtuam leh vai tuamtuam te ah Pau awsuah tampipi theih pen kikhial hetlo ahihlam ka phawk sansan hi.

Nang pau awsuah thuoi nasak mahbang in, midangte pau awsuah thupit bawl in, tua hi leh nang azong hong ki thupi sim ding hi.Nang bek pau awsuah nei hi zenzen lo in, mihing khempeuh in pau awsuah anei vive uh ahihi.Zopau ih cihcih sung pan ih tenna khua awsuah aniam asang dung zui in tawm en suk leng....
English - How are you?
Teizang - Na dadam zia?
Sihzang - Damdam niziam aw?
Khuano- Damdam buang nam?
Zou- Na dadam ei ma?
Saizang- Na damdam hia?
Lushei - Ih dam ve em?
Thahdo- Na dam maw?
Kawl - Nyi kawng La?
Sen - Nyi Hau ma?
Thai- sawadee Krap?

Cihbang in akhiatna kibang awsuah kibanglo vive ahihman in,leitung tomkal ihnuntak sung Pau awsuah tampipi athei zo te ahampha ahi a,mi pau ih theih kei leh zong eipau beek siam sawm mahmah leng hoih pen ding hi.

Atelthei ih om leh lungdam mahmah na cihsak oohhvooo.. Mate..Cise..Sese..Liangcia,
heihai, mengmang, milmul,liangluang, lenglang, kialkual, kulkul,khialkhual,siuhseuh, seisuai, kengkang, kihkuh, zenzen,liang aw,Hilai ci o,philphul, pelpul,luailuai,kheukhau,khinkhian,Seisai, Nongcia, CieuCiau, Teitai, Tiaituai, Tentan, Khinkhian, Q kheu, Belbal, Belbol, Nengnang, Ningniang,Nelnal, Nangnang,Nemnam,Siasua, kiuhkeuh, cihdan nengneng...

Mikang pau in leh mikang lai in athei ih om leh hehpihna tawh hong theisak kik un cih kong thumnuam kawm hi.Zopau athukmahmah dan leh namdang tawh akibang kholloh dan cihdan khawng peuh maw..cih se maw..phawkse hia...Vialnong in maw. hih pian kheu se...Zoplai ding....



--
Tg.Zogam Mungno ( Patriot Fighter )