Thursday, February 17, 2011

Pu Thag Za Dal Interview

INTERVIEW | PU THANG ZA DAL PDF Print E-mail
"India pen 1965 (kei ma i kum 20 ka phak lai) ah Imphal leh Lamka ah hong zin ngei ing. Tua hun in Pu Tun Kho Pum i phualpi (camp) ah nipi kal 2 (2 weeks) a mah tawh ka om khawm hi. Imphal Jail sungah Pu Son Kho Pau ka va ki muh pih hi. 2003 kum in Calcutta, Gauhati, Shillong leh Dibrugharh - a vek in ni pi kal 3 kong hawh ngei hi."

Tutung ZogamOnline in Germany a khosa Pu Thang Za Dal i houlimpih thei a, kipahhuai i sa hi. Amah Pu Dal hi Chinland Guardian te’n a paisa kum 4 ma deuhin interview ding a ana dawp khin mahle uh lohsam ua, tu’n ei ZOL toh houlim ding lem honsakpih ahihman in manpha i sa khol diak hi. Pu Dal hi India Zomite in i theih khollouh hangin gam-le-nam a dinga ama hihtheih bangbang a ana kizang mahmah mi khat ahi hi.

Tu’n amah i theihchiang semna dingin amah toh i houlimna sim theih dingin i luikhia hi.

ZOL: Amasa in ZogamOnline minin Chibai Pu Dal! Houlimna ding hunlem na hon bawlsak man ka lungdam uhi. ZogamOnline mun tuamtuama om Zomi te kithuah leh kizopna dinga ka na bawl uh hiven, na veh kha ngei diam ah...
TZD: ZOL pen kha khat sung khat vei bang regularly in hong hawh mah ing.

ZOL: Panpah mai le. Na pianna, na khanletna, na laisimna khong no’n hilh thei diam?
TZD:
Polical activity pen 1963 kum bei lam pan a kipan (kum 19 ka phak hun) a active tak a diangta ka hih man in matriculation exam zong ka bawl man nawn kei hi.(4th Standard exam ka bawl ma deuh ka ci dam lo man in kha 3 sung lupna tung ah lum ka hih man in examination ka kia a, 5th standard ka tun ciang zong in ka hernia operation bawl man leh ka mittang dam lo man in kum lang khawl in exam ka bawl nawn kei hi.)1964 pan a kipan Germany gam ka pai dong (1978) Kawlkumpi langpan Kawlgam sung armed movements tuam tuam te kiangah ka khualzin leh ka sep tam pen hi. Ka political activity tawh kisai khen khat belh tu khasung (13th-15th October ah Aizawl ah a ki bawl Seminar) sungah aki hawm khia CHIN FORUM MAGAZINE sung sim thei nu teh - A thu lu: SUPPRESSION OF CHIN NATIONAL MOVEMENT FOR FEDERALISM UNDER THE REVOLUTIONARY COUNCIL AND THE BURMA SOCIALIST PROGRAMME PARTY(1962-1988) . Tua sung ah om Pu Thang Za Dal a ki ci pen kei mah hi‘ng.

ZOL: Na zil-le-ta te, bangchika zi nei, nau bangzah nei, na tate bangbang sem chih khong hon hilh ve.
TZD: Ka Zi pen Assam gam ah Ahom kingdom a phutkhia Mao Shan mi nam te hi. A mah mah zong Mao Shan Ukpi nam te hi. Ka ta nu Dim Khan Vung pen hih mun ka tun khit uh teh suak hi. A mah pen tulaitak in Hamburg University ah pilna sin in om hi. A man dek ta hi. Man leh Sangsya (teacher) sem kha in teh. German, English, Christian, Shan min cih bang te nei lo hi. Ka nu Khup Kho Dim tap aa Dim Khan Vung min ka pia uh hi. A min seel pen “Vungpui“ hi.

ZOL: Bang kum a Germany bangchi tun khak na hia? Tu’n Germany a koimun a bang sem na hia?
TZD
: Germany ah 1978 in tung ung. Hamburg khuapi ah om ung. Hih khua ah a teeng mi pen 1.8 million bang hi. Germany gam bek hi lo in Europe khempeuh sungah zong a nuam leh a hoih pen khuapi te lak ah a 2 na hiam 3 na hiam hi. Ka te‘n na mun pen Hamburg University campus tawh ki zom lian a hih man in nuam peuh mah hi.

ZOL: Na nekzonna na nasep toh kisai non hilh thei diam?
TZD:
Hih mun tak ah Taxi hawl ing. Kum 18 bang pha ta. Germany gam khuapi lian khempeuh phial ah taxi driver te lak ah 90 % bang pen German mi a hi lo gamdangmi(foreigner) ngen hi. Iranian te tam pen. Tua khit teh Afaghanistan, Arab leh Turks te tam pen hi. Kawlgam pan Germany gam bup ah taxi hawl a sem pen kei bek hi ing.

Hih gamdangmi taxi driver te sung ah medical doctor, engineer, lawyer, architect cih bang leh academic lam ah doctorate a ngah khinsa zong tam pi om hi. Hi taxi hawl tawh ki zom in ih minam pihte’ theih ding a ki lawm leh a thupi mah mah khat pen ei Third World gam tuam tuam te sung ah taxi hawl bang hi lo in TAXI STAND khempeuh (railway station, airport, seaport cihte pawl pan a ki pan) ah a tung masasa line sung ah ki gual in passenger te ki ngaak hi. Ei lam bang a taxi hawl te‘n passenger kituh gawp, kisut gawp chih om lo hi.

ZOL: Nang Germany a citizenship nei dan maw, omdet na sawm hiam?
TZD:
German citizenship suak nuam lo ka hih man in seau lo hi ing. Citizen ka suak nop lo na thu pen a dang hang hi lo in ZOMI/ZOSUAN ka hih na PRIDE ka neih na hang hi. Tua a hih man in kei pen political refugee status tawh om lai ing. A German law dungzui in ci leeng kei pen hih gam ah ka om zawh kum 8 a phak khit teh citizenship seeuh theihna right nei hi ing. Kawlgam mi hih gam ah a omte (2000 kiim bang hi kha in teh) lak ah kei bang a citizenship a seeu nuam lo kei bek ka hih man in ka pawl, ka lawmte khempeuh in kei pen MIHAI sung ah hong koih uh hi. A mau hong muh dang mah bang in zong MIHAI takpi mah mah hi kha ning. Bang hang hiam cih leh hih gam hong tung te khempeuh in citizen suak nuam lua a hih ciang e! Ka zi leh ka tanu uh zong German citizens a suak zawh sawt ta.

ZOL: Zosuante tanchin laibu khat na gelh hi in ka thei a, a bu min bang ahia? Bangchik chianga gelh zou ding?
TZD
: Hi mah hi. Ka paper thu lu pen An Introduction to the Zo People of Bangladesh, Burma and India hi. Wikipedia(English) sung ah mun 5 khawng hiam ah Links in ki koih. Hih paper pen sawt lo in ki update ding hi.

ZOL: A thutun bang chih leh bang ngimna nei a na gelh ahia chih nong hilh thei diam? Laibu dang bangzah na gelhta a? Na Autobiography khong na gelh (sawm) hiam?
TZD:
Tu lai tak tua paper ka update na diing in buai keei hi ing. Tua lo bel Burma‘s 56-Year Old Civil War(1948-2004): A Brief Chronology cih khat zong ka gelh hi. Tua ban ah Kawllai tawh Where Are We Heading For? cih thulu tawh 1977 kum in laibu khat ka gelh a copy tam pi ka na hawm khia ngei hi. Tu lai tak ka buai pih pen laibu khat om. Thauvui. thautang suang a political movement khat tawh political aims and objects te ngah na diing a diang khia nuamte i zat ding a kisam guidelines cih bang daan khat hi. First draft pen laimai (page) 180 bang pha. 2012 bang teh ka man siang zo tam. Hih laibu sungah a thupi peenpeen topic lak ah STRATEGY leh TACTICS lam hi pha diak hi. Autobiography khat gelh ding in kipan pan taa ing. 10-Year Plan hi.

ZOL: I history leh ngeina toh kisai laibu i neihte a tangpi in bang na chi muh a?
TZD:
Ih neih sa history leh ngeina toh kisai laibu teng hoih tak a gawmkhawn in STANDARDIZE daan ding kisam sa ing. Bang hang hiam cih leh minamdangte‘n ih history leh ih culture te lunggulhnaa tak tawh study bawl nuam leh authoritative references a a zat thei tak tak diing om naai lo hi ci in mu ing. Kei bang sum-leh-pai a ki cing in nei hi leng hih bangte project khat tawh bawl khiat zawh na ding in panpih/huh nuam phial hi ing.

ZOL: Laibu i gen leh Pu Vum Ko Hau chihte khong lungsim ah a hong lut a. A tanchin tomkim a diakin lai lam a a contribution nang theih bangbang non hilh thei diam?
TZD:
Pu Vum Ko Hau ii laibu pen ka sim sim teh GOLDMINE tak takkhat na hi mawk hi. A mah zah in ih Zomi te tung taang thu tuam tuam te a cing in a khawm khia khin Ei mi lak ah tam lua nai lo ding dan in ka mu hi.

ZOL: A min Vum Kho Hau ahi hia Vum Ko Hau?
TZD:
A official min pen Vum Ko Hau cii in gelh hi. A kua ma peuh ih thei sa ciat mah bang in ei Zomi te‘n ih spelling uh ki standardized nai lo a hih man in ih lai gelh daan te ih uut uut in ih gelh mai hi. Kawlgam lam Zomi te‘n khenkhat in “Kho“ tawh gelh; khenkhat in “Ko“ tawh gelh; khenkhat in “Khaw“ tawh gelh. Hih bel a bulpi hong pian na peen “KHUA“ hi ngeel khaa in ka um hi.

ZOL: Kua in influence a amau hunlai a lai leh pilna na deih leh sin hi ding hiam?
TZD:
A mah pen a neu lim lim a pilna lam leh siam na lam a kin khat hii in ka thei.
A pa zong Zomi lak ah Kawl lai leh Kawl kam a siam ma sa pawl hi.(Ki phatsakna dan peuh in nong muh khak kei uh leh maw- a nu Pi Ciang Zam pen Lophei Ukpi Pu Khup Lian (ka pa i pa) i first cousin hi. Ka pu pen Mikang te ih do hun lai in hand-to-hand fighting tawh semi-automatic rifle a ngah masa pen hi. Tua hun in a kum 20 bang pha kha leh kilawm.)

ZOL: Kawlgam political dinmun leh kawlgam a Zomite dinmun na muhdan tomkim non hilh thei diam?
TZD:
Kawlgam political dinmun pen hih bang interview sungah geen khiat ziau diing in complicated lua sa ing. Ei Zomi dinmun zong layman khat in baih tak aa tel thei ding in gen ding haksa sa ing.

ZOL: Zosuante – Chin, Mizo, Kuki, Zomi chih bangin min tuam chiat pomin i om a, mailam ah i kigawm theih na gingta hiam?
TZD
: Zosuante teng ni khat ciang in ih ki gawm kei leh minam khat min tawh ih nungta (survive) zo kei ding hi. Hun khat teh hih bang a ih kigawm loh a a pian theih loh na ih mi nautaang (mass) in hong thei ding in ka lam en hi.

ZOL: ZORO te USA khonga pai zel, UNO khonga malakna nei chih khong kiza zel hi. A malaknate uh na theihpih hiam, lamet huai nasa hiam?
TZD:
ZORO te thu tampi thei pih lo hi ing. Bang bang hi leh sep het lo saang in a phatuam na om zaw ham tang ding in ka lam en hi.

ZOL: I pau mahin gap hong neisak ahihmanin Zosuante’n common language i neih kul nasa hiam? Common language bang chi piansak theih ding ahia/ amah hong ki evolve mai thei ding ahiam, na muhdan theihnop huai e.
TZD:
Common language belh minam sim in a neih loh a a poimawh vanh khat hi. Kei bang personally in Duhlian dialect hoih a sa hi mai ing. A hih hang ih Zomi nam tuamtuam te lak ah dialect khat peuhpeuh common language in zangh khawm ni ci le hang hong saan kim diing baih in ka um kei hi.

Hih pen long-term plan aa ih koih ding khat in ka mu hi. A ma thuthu in zong hong evolve diing dan in ka mu hi. Bang hiam ci leh Mizoram State hong pian khiat khit ciang in evolution pan (kampau tawh ki sai) speed khat hong manlang vat hi cii in ngaihsun ing.

A nih na ah Kawlgam lam pan Mizoram ah refugee tampi hong lut ciang in zong tua evolution pan khat vei step khat saang zaw in hong manlaang sawn sawn in ka mu hi. A thum na ah Nisuahna lam, nitumna lam, saklam, khanglam mun tuam tuam ah om ih minam te lak ah national and political consciousness peen a saangto tektek dan in zong ka mu hi - gentehna tu ma kum 10 kum 20 khawng lai tawh tehnghatna.

ZOL: Zosuante India, Burma leh Bangladesh khong a om i hihmanin i omna chiat ah i haksatnate kibanglou hi. Politics lam bang ah i issue leh ngaih poimohte i omna tuam dungzuiin tuak vek ding hi. Zosuan bup a ding politics lam hitaleh kong khat peuh ah a common a malakna leh kalsuanna bangbang neih hoih ding ahia?
TZD
: Zosuante pen international boundary in mun 3 a hong khen a hih man in ei mau mun tek hahkat ciat diing hoih sa ing. Minam khat ih hih lam thei kim ciat in khat leh khat ih ki huh zawh zah in ki huh leng zong hun khat/ni khat hong tun teh common cause khat tawh ih din khiat, ih sepkhop khiat zawh hun zong om in um ing.

ZOL: Gamdang a na om khit sawtta ding hiven, kawlgam a na zin nunung pen bang kum ahia? India ah na zin ngei hiam?
TZD:
Kawlgam pen zin thei lo hi ing. Zin thei ta mah leng zong zin nuam kei ning. India pen 1965 (kei ma i kum 20 ka phak lai) ah Imphal leh Lamka ah hong zin ngei ing. Tua hun in Pu Tun Kho Pum i phualpi ah nipi kal 2 (2 weeks) a mah tawh ka om khawm hi. Imphal Jail sungah Pu Son Kho Pau ka va ki muh pih hi.) 2003 kum in Calcutta, Gauhati, Shillong leh Dibrugharh - a vek in ni pi kal 3 kong hawh ngei hi.

ZOL: Gamdang a om himahle chin i gama i mite toh contact leh ki thuzakna nei thou ding na hih the tuni a i value system bang chi na sa a? Khovel mundang bang thouin i materialistic gawpin chihtakna leh ginomna khong i tasama sum muhna di taphot hihmoh neilou hile kilawm sakna om hi. Nang bang na chi muh a?
TZD:
Hih thu pen keima theih bang daan ahih leh baih ziau a kong dawn diing haksa ka sa hi. Leitung minam khempeuh phial in value system uh neih kim ciat ci in ka thei hi. Tua value systems te hong pian khiat ki pat na mun pen biakna (religion) ahih kei leh ngeina (culture) a hih kei leh tuate geel ki gawm na pan in hong piang khia ci in ka thei.

Ahihhang minam khat in a kim a paam aa teeng biakna tuam leh ngeina tuam a nei minamdang te tawh social intercouse a neih ciang in a mau i original value systems teng zong damdam in hong ki laih to to daan hi. Tua baan ah economic systems dang (gentehna: capitalism=materialism) khat peuh peuh tua minam khat sung (gentehna in taangtawng peh pan a khawksa leh khawisa tawh nungta society khat) hong luut ciang in zong ih value systems te hong ki kheel to sawn sawn daan khat hi.

Ih pu ih pa tee hun lai in ci leng community khat sung ah ih piankhiat na pen na na thupi mah mah: gentehna ukpi nam maw, sal maw, sila maw cih te pawl leh galhang, meihdawi, thukhual, thu khual lo, na seem haat maw, tha dah maw cih te pawl pan in e. Capitalism hong luut ciang in ih value systems lui teng zong damdam in hong bei a sum leh pai neih leh neih loh te, pilna siamna neih leh neih loh te, inn hoih neih te leh neih lohte, za leh min neih leh neih lohte, cih daan a hong pai ta a hih lam a kua ma ciat in ih thei sa ngen hi.

A tom in ci le hang, hih modern value systems te‘n ei Zosuante sungah a khom khat hong luut khin hi ci in ka mu hi. A hih hang ih rural area (a pualam i influence a tha haat naai lo na mun te) ah bel ih taang ngeina - old value systems - teng a khom khat om vee vee laai hi in um ing. Bang bang hi leh hong pai ding hun saupi te sung ah ih kiim, ih paam ah om minam tuam tuamte i value systems in hong influence seem seem diing in ka um hi.

Kei pen personally in ih culture lam tawh ki sai lam ah conservative mah mah khat ka hih man in (social leh political lam ah belh liberal mah mah leu leu ing) ih Zo ngei na te (cultural heritages) kep cing diing bek tham lo in revival bang bawl kiik diing a uut mah mah ka hi hi.

ZOL: Kristianna i suah mana i ngeina hoih leh value system teng mangsak i hi diam ahihkeileh khovel kikhek leh kimkiang influence ziak hi zaw? Mizoram khong ah i nam naupang lua in principle kip ki neilou dana gen pawl a om ua, nang bang na chi muh a?
TZD:
Hih thudot na tung tawh kisai bel a tungah kong dawn sa teng in zong a khom khat huam taa ka sa hi. A hi ta zong tawm hong behlap ning. Kristian ih suah man a phat tuamna tampi a om mah bang in a manpha mahmah ih ngeina luite zong tampi bei mah hi. A hita zong in hih pen eimi te sung bek hi lo in khawvel mun khempeuh ah zong tua bang hi khin ta mai a hih man in nostalgic ding lo ngaal bang mah ki kheel thei in um nawn keng. Ih minam naupang lua lai a hih man in principle kip ih neih lo na daan pen khen khat maan (dik) ding hi na ven khuavel ki heina tawh old culture tampite lak zong (gentehna: Japan, China cih te pawl) ki lamdang lua khol nawn lo in ka mu hi. Tua bek tham lo in generation gaps in zong thu tampi geen in ka um hi.

ZOL: Chimawk le, phamsa Pu Vumson bang Kristian hilou chih a kigen abang a, nang Christian himah niteh maw?
TZD:
Kei pen “Pasian om hi“ cih a a um mihing khat hi bek in Christian ka hiam, hi lo ka hiam kei mah leh kei mah ka ki define thei kei hi. Bang hang hiam ci leh denomination neih lo hi ing. Ih kha(soul) ii Gupkhiatna(salvation) leh Eternal Life ih ngah thei na diing Laisiangtho(Bible) sungah a kim tak in ki gelh khin a hih man in mihing te leh Pasian kikaal Palai(self-appointed middleman) om ding kisam ka sa kei hi.

ZOL: Bianca Son in apa Vumson autography a gelhna ah thudiklou om hileh a kilawma, tua thudiklou pen ngai khawkin lai bang na gelh in kana thei ua. Nang Pu Vumson Shante khut apan va hunkhia dan na hi hia?
TZD:
A masa pen in Shan te hi lo in Kaya(Karenni) te khut sung pan hi zaw hi. Hih thu pen sau a hih teh - tua bek tham lo hih interview a sim te lak ah Kawlgam thu pai dan leh geography a thei tam khol lo ding ahih man in a tom thei thei in kong gen ding hi. Pu Vumson pen Kaya State sungah om Mawchi mines ah geologist a sepna pan in Thai gam lam manawh ding in hong tai khia sim hi. Tua leh Kawlkumpi thau vui, thau tang tawh a langpan Karenni Revolutionary Army te i tax station ah hong tung hi. Tua lai tak in kei pen Chiangmai, Thailand, ah ka om lai tak hi in Karenni tax station pan telegram khat ka ngah peuh teh a sun a zan in ka na delh pah a (motor car, khe - on foot- leh motor boat tawh) tua mun ka tun ciang in a station commander pa pen ka lawm hoih mah mah khat na hi in tua pa kiang ah ka sanggam pa Thai lam ah ton pih pah ding hi ing ci in tua mun pan in motor boat tawh ka pai khia uh hi.

Pu Vumson in “Pa Dal, a makai te permission ngen phot lo in hih bang aa nang kong zui ding baih mawk ding a hia?“ hong cih te, ken “Lungkham ken. A HQ sawt lo in pai ding ka hih leh Karenni makai te kiang ah ke‘n dam in ka na gen siang ding hi.“ cii in ka dawng hi. Pu Vumson in belh a zi (Bianca i nu) a dik tak mah in gen hi na ven Bianca te unau kiang ah thu dik gen lo hi leh ki lawm. Tua zong lamdang khol kei. A mau unau gel neu lai bek tham lo in ei lam om dan zong a thei a kul na om lo sa hi mai leh kilawm. Karenni makai te pen 1965 pek pan a ka kithei pih leh ka ki iit pih mah mah te hi in 1970 kum kipat lam Thailand ka tun khit ciang zong in a HQs pen a vahawh mun den ka hih man in a mau i permission ngen phot lo in kei ma thu in a tonpih pah ngam hi ing.

Hih tak aa theih huai thu tawm hong gen leng foreign-trained Kawlmi geologist 6 zong Pu Vumson tai khit teh tua lam mah tawn in Thailand lam lut nuam pen lampi ah “mangthang“ hi. Pu Vumson tai ma deuh a a tai khia German-trained Karen geologist khat belh Karenni HQs ah om in Thailand lam ah zong khualzin sak lo uh hi. Pu Vumson pen Karenni gam pan ka paikhiat khit uh teh Chiangmai a om ka ki iit pih mah mah American missionary family khat kiangah ka tung sak a, tua pan in a ma‘n Bangkok ah om German Embassy contact in Germany a na tung hi.

ZOL: Germany ah Zosuan a vekin bangzah a pha dia? Nekzonna dingin bang nna khong a sem tangpi ua? Midang hong lutbeh theihna ding kong bangbang a ki hong a?
TZD:
Germany ah Zosuan pen a vek in 300 kiim bang om in teh. Na sep nei khin ciat uh hi. A sep tak tak uh bel thei sak kim keng. Haka leh ei Tedim lam pan tam pen hi. Tedim kampau belh 80 bang om leh kilawm. Midang hong lutna ding bel haksa seemseem hi. Political asylum seeu ding lo ngal - ahih kei leh - IT lam ah siam mah mah te lo ngaal - baih lo hi.

ZOL: Late 1970s hiam early 1980s lai hiamin Chimnuai Magazine hiam khat ah Colombo Plan nuaia Australia a laisim khatin a laigelh ka simkha a, nang hi dinga kong na ngaihsut mawkmawk hiven matriculation exam manlou na chi a...
TZD:
Kei Colombo Plan tawh bang mah ka ki sai ngei kei hi.

ZOL: Zomite’n internet i zang phatuam in na thei hiam? Zonet khong ah lai ka gelh nuam nawn kei na chi hileh a kilawm a. Zomite’n internet i zatdan leh Zonet na muhdan non hilh thei diam?
TZD
:Internet Zomi te‘n hih zat thei pen siatna sang in a phat tuamna geen zawh lo in tampi om zaw hi.Internet om kei leh tu‘n ei bang khat leh khat ih khan tawntung aa khat vei beek zong ih ki thei ngei kei kha ding hi.

Zonet ah lai ka gelh nop lo na pen a dang hang hi lo in tua sungah lai gelh pawl khat pen piicing (mature) lo lua a hih man in personal attack khawng bekbek tawh ki tawngtawng lel mawk a hih man in ka hun manpha te paammaih lua ka sak man hi.

ZOL: Zomite IT lam ah bang dinmun ah na mu a? Nang muhna ah i gam (kawlgam leh vaigam) a IT lama malak theihna ding bangbang om ding ahia?
TZD:
Ka theihna zah bang hileh ei Zomi te zong mun tuam tuam ah IT lam a sin leh a siam zong om khin ta hi. Ahihhang tua pilna leh siamna nei ih minam pihte ih gam leh ih minam te phattuam na ding ih zat thei na ding pen ih gam ih lei ah ei ma deih bang ih vaihawm thei na ding in POLITICAL POWER ih neih phot hong kuul ding daan hi.

ZOL: Personal deuh ki dong le. Na hinkhua ah lohching na kisa hiam? Huchi in na hihka leng chia kisik velvulna na nei hiam?
TZD:
Ka khan sungah ka kisik na ding tam khol lo hi. Bang hang hiam ci leh kum 17-19 ka phak pan a ki pan ka nuntak (life) sung ka uut leh ka tupnate (wishes and aims and objects) teng pen siang tak a define thei khin ta ka hih bek tham lo in huntom, hunsau (short and long-terms) planning tawh kalsuan thei ka hih man in khial na lianpi (fatal mistakes) lua om lo hi.

ZOL: La na phuak ngei hiam, na phuah ngei leh bangzah phuakta na hia chih hon hilh ve.
TZD:
Ih Zo tangla te kin mah mah ka hih haang in la ka phuak thei kei hi. Ahihhang in Autobiographical Songs belh la phuak siam te‘ ka phuah sak ding in ka geel hi. Sihzang sungah Autobiographical Songs taktak in phuak ding hi le‘ng La Naw, La Kai, La Ngui, La Thal Kai leh A Thip Na cihte tawh a kim tak a phuak kuul ding dan khat hi in laphuak siam tak tak te mah phuak sak ka sawm hi.

Ka geel bang a hih thei leh a tawm pen Gui (verses) 100 bang pha ding in ka um hi. Hun khat teh ih gam ih lei ah nuam tak in ciah kiik thei hun a om leh (sum leh pai zong a ki cing ka neih khaak leh) Sial 10 bang go in zu belpi 100 bang tawh ih tang ngeina taktak in Tedim gam sung ah ih ngeina la siam teng sam (invite) ding in Pawipi khat bang bawl ka sawm phial hi. (Hih bel ka“Sun mang“- Daydream -hi mai.)

ZOL: Bang la (music) khong na ngai sek a?
TZD:
Ih Zo tang la te, Western classical musics, pop songs lui te leh Kawl classical musics teng ka ngai nuam diak hi.

ZOL: Na hun manpha tampi zanga nong houlimpih manin ka lungdam lua uhi. ZogamOnline in na tupnate a lohchinna leh khansauna na neih ding kong deihsak uhi.
TZD:
Kei zong ka lungdam hi.

PROFILE

Min :Thang Za Dal
Nu leh Pa Min :Pau Tual & Khup Kho Dim
Pianna Khua :Lophei village, Thuklai P.O, Tedim Township
Pianni :February 7, 1945
Nekzonna/Nasep : Taxi Hawl

WZC Pu Zokhup Interview

World Zomi Congress (WZC) pan Christian Coordinator, Pu Zokhup (Gin Pian Khup/Gin Pyan Khup) tawh Openzosuan blog holim na;


Openzosuan, '' Manlo pipi kawm kal pan hun nong piak theih lungdam mahmah in, openzosuan min tawh kipak na leh angtang in lungkim na ong pulak ung.''
Pu Zokhup, ''Kei zong tua bang mah hing.''

Openzosuan, '' Pasian hehpih na hang in dam ni teh maw? Zozum/WZC website te ah kicing tak in thu leh la na suaksak khin vua, kicing mahmah in tel beh tohtoh nang in holim na ong nei nuam ka hi uh hi.''
Pu Zokhup, ''Kei zong mipi tel ding pen ka lunggulh ka ut khat ahihi.''

Openzosuan, '' Zomi cih in leilu pan leitaw dong aa ki zel Zomi khempeuh huam hi lo hiam? World Zomi Congress ci in (leitung/leitungbup) cih bang hang in ki hel veve ahia?''
Pu Zokhup, '' Zomi pen na cih bangun, leilu pan leitaw ahuam pah hi mah hi, tua a huamna lian mah, muhtheih le lah theih dinga, ataktak a lahkhiatna in, World Zomi Congress ci a, kiminvawh pah ahihi. Ahuamna lahna limlak hipah hi. Israel te'n zong Zionist vive hikhin napi uh, World Zionist Organisation- WZO ci in, a min vawh sese uh hi. New York ah headquaters phut in, Indepence angah zawh uh ciang , Jerusalem ah tuah uh hi. Amau etteh cihbang hipah samlo hi. Taiwan suahtakna sual te'n zong, World Formusans for Independence na ci in, min nei uh ahihi.''

Openzosuan, ''WZC ii lungtup, The Second Independence Movement pen I biak Pasian awi na hang in i ngah khit zawh ciang WZC ii lunggulh kicing hita aa, nasep mapan na te khawlding maw, ngimna (laih in) a dang khat tawh kalsuan toto zaw ding ahiam?''
Pu Zokhup, ''Zomi independence pen Pasian awina tawh kingah ding ahihi. Banghang hiam ci le, Zogam pen Asia Christian Corrider ( kei phuahtawm hi) ah om i hihi. Asia continent enleng, Zogam pen Communist, Hindu, Buddhist, Muslim le biakna adang tuamtuamte laizang ah om ih hihi. Tua Christian Corrider kacih pen, Zogam, Nagalim, Manipur Hills Kachin gam teng pen, Indian tuipi pan kuuito ngieungeu ahihi. Hih na mitkha ah bawl lecin, Asiabup a, khamangthang le Zeisu thei nailote khawvak piakna phualpi dinga , Pasian in ong tel hi ding in, ka up ahihi. Tua ahihmanin, Pasian in, Zogam Independence hong piak khit ciang, Zogam pen gupkhiatna thu tangko nang phualpi in, Pasian in zang nuam a hi, cih pen ka upna uh ahihi. Tu in, unau Naga te'n Nagalim for Christ ci in, Khasiangtho lamlahna tawh, takkheh ci a, athasan lai tak uh ahihi. Zomi le Zogam bek in, i sep ding kisam lai ahihi.

Independence i ngah khit ciang in, WZC pen kiphiat lo ding ahihi. Zogam i cih pen gam thak i hih ban ah, gam lian lualo i hihmanin, Zogam security dinmun pen delthawng zel thei ahihi. Tua ahihmanin, leitungbupi a om Zomite le, gamtuamtuam te tawh ki tanauna le, pankhawmna kisam den ding ahihmanin, Independence ngah zawh ciang, Headquaters Zogam ah tuah a, leitungbup ah kiptak a, i dinsuak ding kisam ahihi. Tua ahihmanin, nong dotna uh ahi, WZC omlai ding maw? cih tawh kisai in, Zomi le Zogam in, kisam asaktan om ding ahi, ci in, kong dawng nuam hi.''

Openzosuan, ''WZC pen ZRO leh ZNC tawh Trinity cih zah dong in ong ki mu aa, ZRO dan (ahih kei leh) ZNC dan mah in a thuak/sum/bai ngam taktak kipawl na adang ong om leh support piak ding cih mah hi veve ahihiam?''
Pu Zokhup, ''ZRO, ZNC, WZC a kipan, pawl le party tuamtuamte pen, Zomi makhualna ( Zomi Interest ) vive a kibawl ahihmanin, Zomi Interest a ding ahun le amun in, hong phut le, apiang theilo bang mah omlo ahihi. Hihmun ah WZC tawh kisai gen leng, WZC in bel Burma in Democracy le Federal Constitution i ngah/inei ahi phial zong in, tua pen um pah lo ka hi uh hi, bang hanghiam cih le, i sanggam Burmese te pen tangthu ah enleng, khuttung lumleh abang dente uh ahihi. Tua ahihmanin, WZC kalsuanzia pen paitang suak lai veve ding ahihi.''

Openzosuan, ''Zomi sung ah Z min hi ta leh hi ta kei leh gam leh nam aa ding kipawl na tuamtuam om na lak ah na ki hel ngei na leh, na ki hel lai tak na a dang a om hiam?''
Pu Zokhup, ''Zomi le mindang tawh kihelna bel om ngei kawikawi mah cih ding hi

Tuate pen;

(a) Mandalay a Zomi bup sangnaupang kipawlna Chin Literature and Culture Committe- CLCC ah term nih kizom in, Literature Committe ah incharge sem ing, tua sung in, Chin Magazine 1994-5 le Zingsol Magazine-1996, makaite le mipi panpihna tawh kihawmkhiazo cih ding hi. Tualo in Zalat Ni cih laihawm zong lawmte tawh phuankhia in, kawllai in hawm khia ngei ung. Kei bel laisim(sanglai kihello) bel uuk in, lailam ukngiat bel hilo hing, suaktakna lam nasep, a sawm ngiat khat kihi in, lailam tawh kisawhkha lo theilo ahihman a, abual kha hi zaw ing. CLCC le Zomi Siamsin ah lailam vaipua in kihel ngei cih ding hilo dia.

(b) Tualo bel Pu Thang Za Tuan makaih, 1998 Zomi Nam Ni a Golden Jubilee Committe le magazine ah, lailam committee ah, member no khat in, pang ngei ing.

(c) ZNC tawh bel kisawhkha ngei lua keng, kisai khakna a om sun khat bel, 1997 hiam khat , Zomi Nam Ni a ding, Aung San Suu Kyi makaih NLD te'n, Zomi National Day message hong khak nuam in, Zomi tawh kisai, amau etding lai khat hong gelh un, ci in Pu Chin Sian Thang, Pu Gin Kam Lian te'n, Ciimnuai magazine makai Pu Vung Lian Mang vaikhak hihtuak hi, Pu Vung Lian Mang in, nang hong gelh dih o, ci in, kagelh hiven, azang uh hiam, zanglo uh hiam thei keng, kanung ngaihsut kik ciang, keigelh pen background history hiphalo in, Zomite khasiatna, hehna le thangpaihna teng, facts taktak zong hilualo peuh kigelhkha na hizaw mawk hi.

Tualo bel Khatvei 33th street hiam khat ah, Pu Gin Kam Lian in, hongpai pih in, Chin Magazine NLD palai nih kiangah present in kapia uh hi. Tua mun a, lung hong phawng khat bel, tua NLD palaite 2 pen University a lecturer sem ngei hi in, NLD support man vua kitawp sak hi, ci in, Pu Gin Kam Lian in hong gen hi. Limtak zong kiho pih ngam mello hi. MI(thu kan) te alau hizen ing. Ka nung ngaihsun ciang in, Kawl, Shan, Kachin, Karen le minam dangte pen Doctor, Engineer, mihauta, ulian ta a kipan, gam le minam a ding, semkhia ziahziah in, liam le bai, sih le nat thuak keei uh in, ei Zomite pen apil tata meidawi in, bucip manga, Matric B tawh pass ciang lel khong nangawn, pammaih kisa mahmah deep cih pen, dik kasa thei hetkei hi. nang e le? ci in, kaki sittel ciang in, ih zum tha bang hong suak san kei mawh hi. Bangmah manna mel omlo B.A khat sin leltak,Burma Army diklo cih thei gegu a, a bang hi pepeuh na hiam? pammaih na kisak keei pong na? kaki ci phing hi. Piangthakte pau le, " Ka bil hong puak lek" ahihi. Tua tha mah tawh 1998 ciang National Day bawlna ah, 1997 kum banga, hong kham kik peuhmah uh le, Sule Pagoda lamkabom ah, demonstration nei ding, hong kimat le kimat, ci in mi 15 bang kaki thutuakzo nong uh hi. Kamphatna ci ding ih hiam? 1998 Zomi Nam Ni pen, hong kham ngamlo uh ahihi. Cih ciang khong hi, ZNC tawh them khong kisai ngei khakna le, tua hunlai a, khangno khat hihna tawh, haihang ci ding i hiam? panla ngei ci ding i hiam, no khensat zaw un.

(d) 1998 Zomi Nam Ni zawh ciang in, Pu Khai Za Song, Pu Thang Lian Pau ( Tonzang Mipi Palai-MP), te tawh semkhawm ding in, khangno 50 kim tawh kuan in, tua lai ah, kum 7 semkhawm ung. Tua zawh ciang kumkhat sung Pu Romeo Hangzo, Pu Siam Chin Thang tawh " The Zoland Times" phuankhia in, English tawh hawmkhia ung. Manipur mualmite lak ah English Journal omsun ahihi. Ken bel a publisher le ownner sem hibek ing. Lawmte nih English siam mahmah in, amau gelh vive hizaw hi. ZLT cih loh Kuki, Nagate nangawn in, English Journal nei zolo uh ahihi. ZLT zong atawpna ciang dangka hong bei in, kikhawl cih ding hi.
(e) 2006 in New Delhi ah kisuanto in, hamsatna tawh lawmnu in, UNHCR nasiau in, kum 2 val khong ciang, tua siksan in, UNHCR in USA ah hong lawnkhia ahihmanin, 2008 December pan tuni tan USA ah ka innkuan un kibusa phot ung. Hibang kawmkal ah 2010 July kha in, Zogam saltang vai awlmawh Zomi khenkhat in, Zomi le Zogam maban vai, i genkhawm ding ci in, online meeting nei ding in, hong sam uh a, kava pai le meeting hong conduct sak in, kakikum ngeingai uh hi. A kalkik ciang, Zozum i kici ding in, hun ukpu in Chairperson hong semsuak hen ci in, ka ngawng ah chairperson vaipuak Zogam Sial Longpi hong awksak uh ahihi. Zozum pen anung ciangin, World Zomi Congress-WZC cih min kikikpsak hi. Tua hun a kipan tuni tan, WZC ah Zomi le Zogam a ding semkhawm, bawlkhawm thei omsun te, semkhawm bawl khawm ding, ci in, kana kihel ahihi.
Tuateng khong hinteh, kaki helkhakna. Zogam khualzinna ah khatvei le zabang lian veva zel, khatvei le neulua kisa awmtal bawkvak zel, cih ciang khong hi ei guai!''

Openzosuan, ''Hi bang aa kipawl na leh Media tuamtuam ong om pen ahoih lam leh ahoih lo lam % in koi a tam zaw tam?''
Pu Zokhup, ''Zomi sungah kipawl na le media tuamtuam hong om khia zungzung pen alungdam huai mahmah ahihi. Tuni a Zomi le leitung in deih hang , ut hang ci a, i kikoko pih Democracy i cih pen, i sittel ciang Liberal Democracy na himawk ahihi. Democracy i cih pen letkhiana atuamtuam om ahihi. Kawlgam mite i lungsim atamzaw socialist democracy in hong deepcip ahihi. Burmese Way to Socialism ci in, kum 20 val Kawlte'n hong paipih ngei uh a, tua BWTS ah miteng in Burma Socialist Programme Party-BSPP party lut a, BSPP makaite cih bangbang dik in khial ta le zong, kizui nuainuai ahihi. Tua banga Party khat a kiguangkhawm a, kibawngtalzuih pen BSPP le apu uh Burma Army upna ahihi. Leitung a socioalist le communist gamkhempeuh ah zong unity ki thutuahna acih uh pen, tua bang in letkhia khia uh ahihi.Leftistte uk na gam ahilo, dictator gamte ah kumpi semte pen siahuai in pha taleh, mipi te'n va bawngtal zuihna pen , kithutuahna daan in kizang ahihi.
Tua ahihmanin, Pawlkhat party khat, makai khat a ki nga a, ki bawgtal zuih na pen communist, socialist, fascist le dictator te kithutuahna ahihi. Mizawng te suahtak nang, gam le lei kitamkham loh nang cih khong paulap in, mipite kaikhawm uh a, ahizong in,mi khutkuak khat zahte i phattuamna bek tun ahihman in, asawt ciang in, mipi te'n deihlo in, leitungbup ah lumlet uh cih i theih ciat ahihi.
Liberal Democracy ah bel, ngaihsunna kibanglo, mimal, pawl tuamtuam te'n ei hoihsak tek tangpi tangta kiangah luikhia a, mipi tamzaw hupzo ten, vaihawmna len uh hi. Pluralism thupi sak uh hi. Mikhat party khat or milom khat in tangpi tangta talkaih cih bang om theilo ahihi. Paak huan sunga pak tuamtuam paak tawh kibang ahihi.
Tua hihmanin, Democracy pen Independence gam in ding taleng, Federal gam in, ding taleng deihciat i hihmanin, Zomi sunga pawl tuamtuam hong om pen lamdang sak ding bang mah omlo hi.Pawl tampi hong piangpiang dinga, khenkhat ahunzui a, hong mangmang lel ding hi, khenkhat hong nungta suak dinga, Zomi kipawlna muanhuai kihau toto ding ahihi. Zomi Democracy paakhuan ah, paak namkim hong paak ciang, Zogam hongpallun kici thei pan ding ahihi.
Ahizongin akidawphuai khat ah, tulai Zomi pawl i phuan daan bel "Khawta tuukpen suih" peuh i bang luailuai kha thei mawk hi. Ball kikhukna ah team bup in ah hon delh luailuai thei hihang. Tua pen hoihlo hi, aawngna pan i gal te'n kung hong khum ziauziau thei uh ahihi.
Ka cihnopna ah, khat in pawl phuan le adang te'n zong phuan luailuai pong in, tup le ngim, sep le bawl kithuap vive hi ni loh hi. Zomi sunga i neih nailoh human righs, development, gender, translation, science a kipan, subject le issue base a sem ding adil aha a om ahihi. Human rights bekbek enleng zong right to food, right to water, right to education cih bangin simzawhlo in, i panlak ding om ahihi.
Politics pawl khat kiphuan le, Zomi akici khempeuh in, politic pawl phuan pah sawm ngeingai pong, semsuak tinten nuam i hiam? cih lah kisittelo cih bang kitam hi. Nidang in galkap hoih, sikkang inn kilamzo ci in, khang nih mahmah galkap kilut henhan hi. Tua zawh ciang in, kumpi nasem hoih kici leuleu in, khangkhat kisem henhan leuleu hi, tua zawh ciang in, laisiangtho sangkah a, biakna phuan hong laaang leuleu in, tua zawh ciang lampi tuamtuam tawn a gamdang a, kuli kuan hoih ci in, i kiphuzuazua ahihi. Tua bang a, khawta tuukpeng kimawl lunglung i hihmanin, Namdang te'n Chin Ahh (chin hai, chin mawl) hong ci uh ahihi. Kawl paunak ah " Chin Ahh Gyi, Kyaw Khyah Hmah Damiah Hman Tih" ciliang uh hi. " Zohai Zomawl, deklam tuktum gal suak ciang, khawnungpil " ci in khia leng kinai pen in um ing.
Abeisa hun ah, bang thuthuteng om hi ta leh, ei khang pen, ei khutsungah om ahihmanin, Zomi masawn theih nang, i hih theih bangbang, i omna munmun pan, i hih theih lampi ciat tawh, ma i lak ngeingai ding kei bangin, hoih sa zaw ka hihi. A thu kithuap metmat kei henla, thulu tuamtuam akim theithei in semleng, ka cihna ahihi.''

Openzosuan, ''WZC pen Zomi asang zonai lo laizom te tawh ki zop na aom hia? Namdang te tawh ae leh?''
Pu Zokhup, ''WZC pen pawl tuamtuam tawh kizom ding, kisawm masalo ahihi. Apoimawh daandaan a bel, kizop bel kisawm hi. Ahizong in, WZC in apawlmite le Zomi muanga kipan khia ahihmanin, 1. Pawlpi kip le kho nang ma kila masa zaw phot ding hi. 2. Zomi sung vaituamtuam ah mumal mello a, sial ek den keek i bangna le vaihawm ding omlo tagah lubawk banga i omnate, huai khawm kik ding ngimna kinei phot ahihi. Tua foundation teng akip bekciangin, adang kingaihsun pan ding hi. Banghang hiam cih leh, experince tampi kineita in, amah le amah bangkim kisik ( pilna, hauhna a kipan) te bek mah, pawl khawsuak ahihi. Leitung kipawlna tuamtuam ah, a mi cinsak na lel a, kihel kawikawi, minam dang gamdangte kianga, khutdawh ngen nuam bek, niinbung kipawlna tam mahmah hi. WZC in ahih le ipsung sawk masa a, tua khit ciang, Zomi mipi kimanawh sawm pan ahihi. Anunung pen ah, WZC le Zomi mipi zawh mahmah loh ding vaite bek ah, apualam kikonlawh sawm hi. Burma democracy movement enleng United Front pi 4 om in, a 4 a pawl kihel atamzaw kibang vive ahihi. Makai khenkhat in NGO te kianga sum duh bek a, kiphuan zong tam mahmah hi. Burma tawh kisai activist lak ah paunak khat om hi, tua pen " Kawlte mi 2 aphak uh le pawl thum in kitam ding uh" cih ahihi. Hi bang ningneng ahihmanin, alliance le united front tuamtuam a, kihel ding pen kipilvang mahmah ding ahihi.Foreign policy ah bel Zomi suahtakna hong panpih nuam peuhmah kingai ahihi. WZC pen lobby ci a, mite kiangah kizuakzuaklo dinga, nasepna activities tawh mite phawk le awlmawh ding in kipai sawm zaw ahihi.''

Openzosuan, ''Gam leh nam aa ding Pu. Cin Sian Thang zah mah in alamdang phial zah dong aa. na ong sem adang khat ong om leh ZIHA cih min mah tawh pahtawi na piak ding mah ahi thei tam?''
Pu Zokhup,''Pu Chin Sian Thang bek ZIHA piak ding cih thu om zenzen lo ahihi, amah banga piaktak ding mailam ah tampi hong omlai ding pen, WZC lunggulhpi khat hi. 1948 tungtang ah zong piaktak tampi mah om hi, ahizong in, kikhahsuah kik ahihmanin, ngahkik nang a makai Pu Chin Sian Thang kipia phot ahihi. I Ngahkik ciang in, Pu Zo khang a kipan, Zomi suahtakna ngah nang asual khempeuh, alompi a ZIHA piak theih ding hun, kingaklah mahmah hi. Kawl te'n zongLutlatye Mawkunwun ci in, first class, second class, third class bang a, khen deep uh hiven, en zong tua sang thupi zaw in, bawl ding hihang mailam ah.''

The Flag of WZC


Openzosuan, ''CNF te' dialkhai (flag) vai tawh ki sai thu tawm na muh na nong gen thei diam? ''
Pu Zokhup, ''?''

Openzosuan, ''Party (Politic) cih system ah, khat in a khat gensia aa vote zong in a zol aa ki mu, NGO dan system tawh kawlgam hun luanzia ah muibun in mazang zaw ding aci ki om, hih tung ah bang na gen nuam aa?''
Openzosuan, ''Ukarine aa parliament ah amakai te uh thatang takpi tawh ki tangh lai ngei dan hi mate. Sunday sim in WZC meeting na neih na vuah ae kitot/kiseel na te a om ngei hia?''
Pu Zokhup, ''?''

Openzosuan, ''Zot na kamkhat, Hanthawt na kamkhat leh nong gen nop khat (agawm in 3) atom kim in i khup nang in nong gen thei dia?''
Pu Zokhup, ''?''

Openzosuan, ''Lungdam mahmah. Topa thupha.''

WZC/Zozum' Ngim na, nasep nate leh thu tuamtuam te;

http://www.zozum.com/ leh http://www.worldzomicongress.org/

thuzaksak na (website, blog, groupnet, laihawm, adt...) te ah suak sak ding phalna om hi. Ldam :)
--

Sunday, February 13, 2011

Zomi Khangthak Kipawlna ding

Dear It Zomi Khangno pihte,

Zotaang bang adamkim ciatding in hong lamen ing. Ih pianna Zogam leitang tulpan kaizota in, Zomi te mahmah zong ih lungsim te, nidanglai Pute lungsim cihtak bangin, kuamah ki citak zonawnlo hi. Zogam leitang hong palkik theih nadingin, khangkhak Zomi nang leh kei mawhpuak ahihi.

Sak leh Khang, Sim leh Hmar akikhen Zomi te, tuibang kigawmkik theihna ding in, asemkhia, azunkhia, maphu leh apankhia te, anunglam pan tha ih piakzawh nading in, minam it khangthak mimal khatciat in, ih vaihawm hang bangmah khuasuak zolo ding hihang.Tua ahihman in, ih hihna bangbang, ih siamna bangbang leh ih lungsim ah ih khensat zahzah in, ih omna munciat pan, Zomi leh Zogam zuun khawm dingin Itna leh zahtakna lianpi tawh kong zawn hi.

Pasian in, Zogam azunkik ding in, Zomi khangthak tampitak, Leitung hauhna nopsakna gamnuam te ah, hongpuak in, gam tuamtuam leh khuapi tuamtuam tek ah, ih ki thehthang hi.Tu hun ah khangthak te khempeuh kimuhkhop ding pen,ihhun kipia zolo tek ahihman in, hih Computer internet tungtawn in, ki meltheih in, thusung khawm in,ih Zogam leh Zomi ading ih ngeelna ih tupna, ih ngaihsutna thu tuamtuam kizasak kitheisak in,ahoih theipen ding lampi zong in,Research bawlkhawm ding tupna ahihi.

A masa in, USA gam State tuamtuam aom Zomi namit khangthak te,kizopna ding in, hih ( Zomi Youth Org ) hong kibawlkhia ahihi. Hih groups tungtawn in,ngaihsutna tuamtuam te sungkhawm kikum khawmding hihang.

State tuamtuam a om, Zomi te tamna mun te ah akhua dungtawh kizui in, Consultant mi kiseh in, ih sepnop ih bawlnop ih mission tuamtuam te, ih omna tek pan ih minam itna veina tektek tawh semkhawm pang khawm ding hihang. Groups tanu leh Website tanu tengel in, nakhempeuh hong kaikhawm in, thu amanlang in hong zasak pahpah ding hi.

Hih ih Khangthak kipawlna in, aomsa Zomi kipawlna min tuamtuam te leh Biakna pawlpi tuamtuam tetawh kisai kha hetkei leng vaisiang pen hi.Ih tupna in, Zomi leh Zogam politics Movements bek in, ihkalsuan theihna ding hanciam tek leng, mailam ah mipi in, ih nasepkhiatna te tungtawn in, tha hongpia ding uhhi.

Gentehna : Abeisa motor tuahsiatna tawh kisai in, LZI in, mipi tung ah, dongtuak huhna zong in, tampitak mah ngah hi. WZC te’n zong ZNC makai Pu Chin Sian Thang Award pahtawina piading ci-in, phuangkhia a, sum tampi tak ngah hi. Kipawlna khatbek aom hi leh Mipi sung pan, tuazah hong lengkhia loding hi. Mihing khatciat in, ih veina ih ukdan tawh kituak in, ih gam ih minam ading, kipia nuam se hi.Zogam leh Zomi te phattuamnading ahihnak leh kipawlna atam theithei kisam hi. Tam tektek leh nasepna tangzai tektek hi.Kipawlna atawm man in,theihna tawm a,buaina zong tawmpah hi. Kipawlna tam tektek , buaina zong tam, phattuamna zong tam, theihna zong tampah hi. Kipawlna khat peuhpeuh ah na ihsep ciang in, kipawlna paizia leh pankhop gualzawhna kitel zaw a, ih theihna anini in khang hi.

Ih omom na khua pan in, ih minam ading ihsep zawhzahzah in, mapang khawm leng, Zogam mualdawn pan hongphul ciktui neu tampitak hong luang suksuk in, Luipi ah kingawm suk a, gun pi khatbang in, hongluang khia thei hi. Mi te in Zomi te akipawl theilo te hong cihcih te, ei khangthak hun a, Zomi te apangkhawm asemkhawm mite hi’ hong kicihna ding in, mimal khatciat in, cihtakna lungduaina , itna veina taktawh ih minam ih gam zunkhawm ciat ni.

Kipawlna ih bawl kipzawh niciang in, Zogam Zomi a ding nasemkhia te panpih in, thapia ding hihang, Zolai mahmah tawh thukizaksakna Media, Journal, News Paper,Magazine leh Internet tungtawn in, Groups tuamtuam leh Website tuamtuam te pahtawisiam in tha piading hi hang.

A hizong in, Zomi leh Zogam mindai nading, siatna ding leh Zomi Zogam paulap a, angsung bek akhual te zong deihlohna, lungkim lohna te hangsan tak in, gen khia ngam ding hihang. Minam nasepna ah kua mah maitang zahtak omlo in, ahite ahibang in,hangsan tak in, kalsuanpih toto ding hihang.

Mailam ih kalsuan nading te ah, sum leh paai hong kisam pelmawh ding a, tua hunciang in, state tuamtuam aom, Consultant teng in, ih omna khuatek ah, mipi tung ah ih ngap zahzah in hunna ngetna tawh mapang ding hihang.Tua pan ih ngahkhiat sum leh paai te, avek in ngawmtuah in, ih zatnading leh ih zatdanding te Consultant teng in, poll pan vote piaknatawh na khempeuh khensat ding hihang. Ei mimal thusun bang in,vote hong kipiak kei leh akua mapeuh nuak lo ding hihang.

Bang hanghiam cih leh ih tenna USA gam pen, Democracy gam ahihman in, tua dungzui in, Zomi te kimakaih toto ding hihang.US president akitelciang in, amau vote ngah nading tek hanciam mahmah uh hi. Ahizong agualzo te leh aguallel te khut kilen in, gam ading nasem khawm uh hi.

Hih atung athu te, na lunglut dandan leh na ngaihsut na om bangbang in, thu kikum toto kik lai ni cih..

Zogam leh Zomi itna veina tawk tawh Kong zawn hi.

Tg. Zogam Mungno

Tuesday, February 8, 2011

Zoland Movement

Dear All Zomi’s,

Zomi leh Zogam mailam ding thutawm kikumkik dih hi.Zomi ihcih min ahizong mihing ahizong in, sing hawmsung,suang hamsung, vantungpan ahizong hongpian khiatna atheilian kuamah omlo ihhihman in, tam gen nawnkei maidih ni.

Bangbang pan hongpiang ahizong in,tuni in Zomi Zogam cihbang in, mittang mahmah tawh omthei ihhihman in,abeisa ih tangthu te siksan toto leh et kak toto kawm in ,mailam Zomi leh Zogam ading bang sepkhiatding kisam hiam cih lungngai kawm ni.

Tuhun pen IT hun ahih mahbang in,Media lampen Zomi te ki manlang mahmah ta hi.Ka neulai in, kakhua uhah, zingciang tangnasepding aomleh Hausa te in, tangko te zasak in, khuasungteng ah awng kawikawi a, mipi in kitheipan hi.Tuhun in ih omna,muntek pan nisim in,innsung khat omkhawmbang in thukizaksakna manlang mahmah ta ahihman in, hih IT chance te Zomi te mailam kalsuan nading in ih zatsiam tek ding thupi kasa hi.

Zomi tepen leitung mihing minam tampi omteng lakpan, atuampian minam khat ih hihi.Ngeina kip nei,paunak nei, lakam nei,pau nei,gam leitang nei leh beh leh phung gui nei te ih hi sese. Ih minphuak dan khawng zong leitung namdang te’n aneih vetloh uh ngeina kipkhat na hi gige hi.Tua ahihman in minam picing, minam kician ih hihlam kiphawkciat dih ni.

Tang a tuan a kipan ih Zogam ah, kiteng in, namdang mi kuamah in hong do zongeilo uh hi.Ei sung ah athahat zawzaw in uk in,ih gam ei a ,ahihi.Abeisa thu te, kila kiktheinawn lo,kiciamteh theilai bek hi.Uk pi hun akipan tuni dongciang thute tawh buaibuai nawnlo in Zomi bup mailam kalsuan ziading ih vaihawm ih kipawlkhop ding athupi ahihi.

Kei cihbek ihcihcih laiteng in bangmah khuasuak zolo ding hihang.Pankhop ding athupi pen ahihi.Kipawlna Organization tuamtuam tampi tak hong omding thupi hi.Tua kipawlna te in, Zomi leh Zogam pattuamna ding tupna vive ahihman in,member khat bek ah lutsawm in, ih kipawlna te panpih ciat ni.Tua hi leh kipawlna thupaizia kipawlkhopna thahat nate ih mupan ding hi.

Tuhun Zomi te leh ih kim leh pam aom minam dangte thu tawm etkak in khinkhai khawm dihni. Zogam Suahlam enlehang, Sent e leitung ah minam tampen te omna ahihi. Zogam Tumlam enlehang Vai te Leitung ah minam tam nihna te ahihi.Zogam Khanglam enlehang Bangla minam te hi a,agam uh ah ta lo in, aletmang te a hihi uh hi. Hi mi nampi thum kikalah Zomi te ih omkha hi.Kawl minam te khawng pen nampi dang te tawh en leng gentham nai vetlo hi.Zomi te tawh zong ih minam phazah ki tamkhaih khollo kha ding hi.Tua ahihman in, hongpai ding kum 50 sung ciang bekbek enpak leng hibang dinmun in aomsuak hilehang, Zomi akici te pen, gam neilo, pau neilo,lai neilo,behleh phung neilo,ngeina neilo kihiding a,lost Tribe acih taktak kihi zen ding hi. Nampi Sen, Vai, Bangla ( Muslim ) te pen leitung ah atampen te ahihi.

Ih minam ih it takpi leh Gam khat in kiukna thneihna ih neihding ih hanciam ding ahihi. Tu laitak in, leitung gam thupi teng ah Zomi te khaici in, hong kituh laitak ahihi.Laisiangtho sung ah Israel minam te, Canaan gam ah Abraham, Isac,Jacop khang akipan atengteng sa ahihhang in, Pasian in, nampi in bawlnuam a, Egypt gam ah kum 400 sung, gam kiukna,gam khantohna,kumpi kivaipuakna,khutsiam lehpilna tuamtuam sinsak hi. Tua teng atheihkhit amuan hun atunciang in, Canaan gam ah paikhiat pihpan hi.Egypt gampan Canaan gam pen ni 40 painading hinapi kum 40 na paipih hi.Banghanghiam cih leh Egypt gam hauhna, nopna te alungngulh te Pasian in Canaan lutpih lo hi.

Hih Israel te tangthu leh Zomi te tangthu kilamdang khollo hi.Gam nei, ahizong ei leh kiuktheihna ding, pilna siamna, bangmah neinailo ihhihman in, Pasian in, leitung ah huahna pilna apiaksa Gam thupi te bek ah Zomi te hong puak sese hi.( Pasian deihna om hi )

Tulai tak Zomi te gamdang ihtundan pen,Jacop innkuan te gilkial dangtak aom, Josept hang in, Egypt gam ankhingkhamna mun ah gambel( Refugee ) in apaitawh kibang linlian hi.Josept bang in, pilna siamna tawh atungmasa Zomi Pastor te, pilnasiamna nei tea hi uhhi. Amau leh amau in bangmah semzo kei ung aci uhhang in, ih tuntun nag am nuntak khuasak zia na telkhin in, na phukhin uh a, ei atungthak te leh atung nailo te ading lamlak ding in, Pasian ngelna ahihi. Sinai mualdung ahi ( Malaysia, Thailand,India ) khawng aomlai tengzong Pasian in, Egypt gam ah hong puak laiding hi.Ih tu ihta te in Egypt gam pilna siamna hauhna teng sinding uh a, Pasian in hun asak niciang in, The Promise Land ahi Zoland ah pilna siamna, hauhna nakim tawh hongciahpih kikding hi.

Pasian hong huhloh buang in, ih kim leh pam aom nampi te kikal ah Zomi te in, hamsatna tampi kituak ding hi. Zoland kim leh pam aom, nampi te pen Israel gam kim leh pam aom, namdang te tawh akibang ahihi. Milimbia leh Pasian atheilo, akihta lo te ahihman in, Pasian in Israel minam te tungtawn in, avangliatna akimuhsak mahbang in Zomi Zoland tungtawn in leitung ah Pasian in aminthanna athahatna apilna te hong lakkhia ding hi.( Sermon ka hi kei a, Zomi te Dream ahihi.)

Israel mite Egypt gam ah kum 400 sung pilnasin ahih leh Zomi te leitung gam thupi teng ah, kum bangzah hong koihding hiam?Ih cihtak a, ih thuman a, Pasian ih zahtak leh Kum 40 sang tawm zaw.Kha 40 sung zong hithei hi.Pasian in hong muan na ding in, ei zomi te in Pasian muang ni. USA te in, asum tung ah “ In God We Trust “ ci kha zenzen ahihman in, sumkhempeuh ah minneipen minthang pen in, power neipen lai hi.Pasian muang kawm in, ih minam ih gam suahtakna ding lampi te zongkhawm in, pangkhawm ding hi hang.

Minam ading Moses te, Joshua te, Calep tebang Zomi sung ah hong piankhiat mengmeng na ding thungen lai ni. Israel mite Canaan gam na mawk lutsam lo uh hi. Gal dodo in, hiam namkim mah tawh khuapi khat khit khat na dodo uh hi.Zomi te zong Zoland ih lakna ding in, vantung pan hong mawkpiak lo khading hi. Gam leh leitang ihcih in, sisan pan hong piangkhia ahihi.Leitung ading Pasian tapa Zeisu in asisan anuntakna hong piakkhiat mahbang in, leitang mal khat ading in sisan lo in, kimawh ngah ngeilo ahihi.

Nidang in Tem, Nam, Thal leh lum te kizang a, Tuhun ah, Automatic thau nam tuamtuam ahi, AK – 47, Ak – 56. G – 3. G- 4, LMG, M- 20. M- 22, M- 16. M- 18, Longcher namkim te kizang hi.Ih pupa neih Zothau vui thun tawm te hun hinawn lo a, akhangto gam te in, Vang leng hoih nono nam kim Neuclear namkim nei in,agam uh veng ciat uh hi.Zomi te leh ihkim leh pam aom gam te en lehang Sen te in, Neuclear van 240 sang tamzaw,India in 60-80 sang tamzaw leh Pakistan in 70-90 ciang bang neikim mawk uh hi. North Korea in zong 10 ciangbang nei ta ding cih kiciansak ta uh hi.

http://www.fas.org/programs/ssp/nukes/nuclearweapons/nukestatus.html

Ei tawh aomkhawm Kawl te in zong hih Neuclear nakdeih lua mahmah ahihman in,han ciam mahmah uh hi. Tua Neuclear abawlsawm uh tangtung zonai lo ahihman in, mualtung mite Cease Fire khawng bawlpih, Assk zong man zel khah zel in,leitung gam tuamtuam te leh UN mahmah zong khemtheih bangbang in khem uh a, kamkhum taktak kawlngain zang in khemkhem lai uh hi. A tupna uh hih Neuclear Programe mankhin leh,kua mahmah awlmawh nawnlo ding a,North Korea te hongbang lian ding hi.A hizong in, tua Neuclear a bawlsiangzawh ma in, Zomi te’n bangci bang in gam lakik ding ihhiam cih kipat hunta hihi.

Zoland ih lak kikzawhna ding in, hih anuai a thute kisam mahmah ding in,kalamen hi.

1. Pasian muang in, zakta ding.

2. Zoland suahtakna ding ahihnak leh panpih ding.

3. Pilna siamna ih nei bangbang tawh ih movement ading zangkhiading

4. Numei pasal mikim in galvan zangkim thei ding.

5. Zomi inn khat ah automatic thau hoih lawng khat ta neih ding

6. Zoland suahtak nading hong nawngkai sak thei, kawl, Vai leh Bangla te galvan leh thusim te theihkhiat zawh nading.

7. Pau awsuah tuamtuam te tawh buai loding.

Hih atung athu te mimal kimciat veina taktawh pangkhawm le hang ih Zogam hongpaal lunding in ka lamen hi..

Mimal muhna leh Veina bek tawh..


Tg. Zogam Mungno

Zomi Independence vai hilhcian na

Zomi Independence tawh kisai hilhcianna


( Tangpi tangta in, Zomi Zogam vai pen Zolai mah tawh simnuam zaw ahihman a, hanciam a Zolai tawh kigelh ahihi. Tampi tak in, i theihsa hi dinga, a hizong in, tangpi tangta lak ah khen khat a ding thuthak hi ding ahihman a kigelh ahihi. English le Burmse tawh hithute akisim ciang Zomi te'n eite kisai lualo daan a kingaihsun kha pahpah ahihi. sense of Belonging neilo cihna ahihi. Tua ahihmanin, theih huai thupoimawhte Zolai tawh i gelh khia ahihi. Bucing cih bang omlo ding ahihciang diklo a om le comment hong gelh ciat ding in, laisimte i kicial pah ahihi. Zo Khup)
Ih theih tek mah bangin, WZC in Zomi Nampi Ni ciang, Zomi Independence Hero Award kipia ding ahihi.

Hih Award min dingin ngaihsut piakna zong tampi om ahihi. Tualak ah Zomi Independence Hero Award cih min kiteelkhia ahihi.

Zomi Independence akicihna ahang pen, 1948 january 4 ni in, Kawlgam le Zogam kipawlkhawm in, British khutnuai pan, independence i lakhawm ahihi. Tua independence pen 1947 Panglong Treaty siksan a, Zogam in full autonomy/ self-determination kineituam ding, union level ah pen, belpawl thuneihna bek kikoih ding cih ahihi. Panglong kithukimna ngana V ah " Full autonomy in internal administration for the Frontier Areas is accepted " ci in siangtak in kigelh ahihi.

Tua 1947 Panglong Thuciam siksan in, Union of Burma Constitution (1947) kigelh ahihi. 1947 Constitution Chapter 10 ah, Shan le Karenni gam in, kum 10 a cin ciang, Burma tawh belpawlna, a ut uh leh nusia thei ci in, kigelh ahihi. Aung San in, kum 10 kipawl sin photphot in, tua pan na utkei uh leh paikhia un, ci a agenna bucingsakna in, Chapter 10 kiguang ahihi. Chin state pen acil in,Proper Burma( Kawlgam) i terrotorial no khat dinga hong zol uh a, ahizongin mualtung makai dangte tawh kikumna, Ukpite le mipi makai Pu Mang Tung Nung, Pu Vomtu Mang le Pu Vum Kho Hau te thukhualna hang in, Chin Special Division ci in, atuam vilvel in kiding ahihi. Tua tawh kituakin, Britishte bawltawm Chin Hills Regulation Act-CHRA kici, Zogam Constitution pen kiphiat in, Chin Special Division Act CSDA kici, Zogam state constitution thak kikipsak ahihi. CSDA ah bel mipi teelkhiat Mipi Palai- MP ten vaihawmna len ding cih ahihi.

Panglong Thuciam siksan a, kibawl 1947 Constitution tawh, 1962 tan Union of Burma vaihawmna kinei ahihi. Ahizongin, tuahun sungin, Zogam vaihawmna ah Panglong Thuciam banga Zomi makai te'n vaihawm theihlo uh ahihi. Banghang hiam cih le, 1947 Constitution tawh, Chin Affairs Misnister ding, Zomi te'n kiteel theilo ahihi. Banghanghiam cih le, CAM pen Union Cabinet rank hi a, Union Cabinet Member teng pen, Prime Minister i piak theih bek ci in, kigelh ahihi.

Chin Special Division sunga, vaihawmna le khangtona khempeuh pen, CAM i khut sung ah om ahihmanin, CAM pen 1947 constitution ah, panmun poimawh penpen khat ahihi.Zogam kumpi cih ding ahihi.

Atak tak ah CAM pen, Zomi mipi palai te'n, amau lak pan adeih pen uh, ateelkhiat ding uh ahihi.1960 kum kiteel pi na ah, Zogambup ah CNO le AFPFL in zo uh a, Zogam kumpi bawlkhawm ding in , kithukim uh hi. Union government ah azaksak ciangin, mipi palaite deihna nial in, Zogam a MP tawm nei pen, Pahthahsah

Party pan Pu Za Hre Lian pen Zogam kumpi ding in, seh mikmek uh ahihi. hih pen Panglong thuciam 5 na palsatna ahihi. Kawl hilo gamte in, amau gam sung ciat ah, thuneihna kinei ciat ding uh cih pen, hong palsat tak ciang un, makai le mipite zong lungkim hetlo ahihi.

1960 kum kiteelna zawh ciang, U Nu pen khat vei Tedim hong hawh in, mipi le makai tuamtuam tawh kihona nei ahihi, tua mun ah ZBC Rev. Hau Go ( Sukte) in " Banghang a, mipi atamzaw deihte kumpi semsak lo a, mipi deihloh pa , kumpi semsak na hiam? ci a dot le, U Nu zum leh heh mahmah in, sangmang Rev. Nelson kiangah " Na misokpa hoih tak kem in" ci in ngiik ahihi. Rev. Nelson in " Ko America ah Pastor te'n zong politics sem thei hi ung" ci in dawng ziau ahihi. U Nu aciah khit ciang, Nelson topa pen Burma pan hawlkhiana lai suaksak pah in, Zogam ah sangmangte abeina ahihi.

Hibang dinmun ahihmanin, 1947 Panglong siksan a kila, 1948 Zogam Independence pen, bucing taktaklo hong suak ahihi. A laigil kiciam khalo cih ding ahihi. Zogam mah bangin, Kachin gam, Shan gam, Karengamte ah zong, Union Government in mipi deihlohte amau thu in, seh ziauziau uh ahihi.

Tua ahihmanin, 1961 kum in, Kawlgam losiah gamdang teng, Taunggyi ah kikaikhawm in, 1948 constitution velkikna nei uh ahihi. Tua velkikna pan in, 1947 kum Panglong Thuciam tawh kituak taktak, Constitution khat geelkhia uh ahihi. Shangam in Federal taktak tawk kivaihawmna ahi, Constitution khat hong sung in, tua pen mualtung makai te'n , ngentel tak a, avel khit uh ciang, kithukim diamdiam ahihmanin, Union of Burma Innpi ah sung ding in, kithukim uh ahihi. Tua kithukimna thusun pen " Shan Mou" or " Federal Proposal ( Federal Mou) " kici ahihi.

Union innpi ah Federal Proposal sung ma in, malepna in Federal Seminar khat bawl masa dingin, kawlgam makaite le, mualgam makaite kithukim ahihmanin, 1962 march 1 ni in, seminar kipan ahihi.

Federal Proposal in Burma kitamkham sak ding ahihmanin, cih paulap in, thuneihna buluh uh ahihi. Union Cabinet bup manin, jail puak uh ahihi.

Ataktak in, 1962 kum Kawlgalkap in, power a buluhna uh pen, Federal hang hilo in, Socialist te'n 1960 kum kiteelna ah, a guallelh man vua, thangpai a, anungzui uh ahi, Ne Win makaihna tawh power buluh uh ahihi.

Aung San hun lai in, Phasahpahlah AFPFL pen pawl tuamtuam kikhaikhawmna ahihi. AFPFL ah Communist le Socialistte pen ahat penpen uh ahihi. Leitung tuiluang zui in, Communist Party of Burma in galvan tawh power lak ding hong khensat uh ciang, AFPFL nusia in gamsung ah lut uh ahihi. Burma Army sunga, Communist cadre teng in zong zui ahihmanin, Burma Army phel nih kisuah ahihi.

Communistte phel nih kisuah ahihmanin, AFPFL le Burma Army ah Socialist teng bek hong cianlai uh ahihi. Ahizong in tua acianllai AFPFL zong hong kitam in, 1960 kum kiteelpina ah AFPFL phel nih tegel hong kidem uh ahihi. NU- Tin AFPFL pen anungciangin, Pahthahsah kici in, kumpi sem uh ahihi. Kyaw Nyein- Ba Shwe AFPFL in lel ahihmanin, thangpai mahmah uh a, Army sunga a nung zui uh, Ne Win power lasak uh ahihi.

Ne Win pen Acil in, Burmese Facist makai minthang Thakhin Ba Sein le Tun Ook te nungzui lubok khat a hihi. Ba Sein-Tun Ook te pen Aung San- Mr. Hmaing ( Thakin Kodaw Hmaing) group tawh ideology ah kikelki uh ahihi. Ba Sein tepawl in Fascism lam pakta uh a, Aung San te pawl bel leftists ( Socialist, communist) ahi uh hi.

30 comrades kici, yebaw tongcheih ding akitel ciangin, Ba Sein lampan Ne Win kihel in 11, Mr. Hmaing lampan 19 kiteelkhia ahihi. Aung San in avek un makaih in, asung thu ah Ne Win- Set Kya makaih fascist lubokte le Let Ya-Zeya makaih leftists te kilem hetlo in, Formusa ( Taiwan) ah trainning aneih lai tak uh kibuai gawp uh ahihi.Ahizong in Aung San in lemtuah kik a, kilem taktak lo pi, tentan zo uh a, BIA min tawh Japante pang beel in, Burma hong lutkik uh ahihi.

Japan pangbel in BIA hong lut, Delta bial hong tung ciang un, Karente pen abanban in, thahlum le khua teng haltum hong kipan uh ahihi. Tua ahihmanin, Delta bial ah Burman- Karen tualgal nasia tak in, hong piangkhia ahihi. Putek pitek, numei naupang cih omlo in, Kawl le Karen hong kithat uh ahihi. Japan te'n dik salo in, BIA makaite kiang ah, anautangte uh kho dingin thupia uh a, alang nih tuak, lemtuah uh ahihi.

Tua bang hun sung mah in, Zogam ah zong Chin Defence Army ci in kiphuankhia in, Pu Thawng Cin Thang, Pu Vum Kho Hau cih ten makaih in, Japan tawh kipawl in, British te kido ahihi. Japante huaisialua uh ahihmanin, Sukte Independence Army-SIA ci in, General Hau Za Lian makaih in, kiphuankhia in, Japante kido leuleu ahihi. SIA pen sukte uksung bek huamkha ci in, Sihzang kuam te'n Siyin Independence Army ci in, letkhia uh ahihi. Tangthu gelhte in, Chin Independence Army ci in, anunglam ciang gelh uh ahihi.

CDA le SIA pen galpi nihna sung, leitung politics ah, sanggam melmak hun a, hong piangkhia ahihmanin, Bristish te honglut kik ciang, SIA pen Japan hunlai in, CDA in British a do uh tawh mekmat khawm in, SIA makai tampi galpi 2 zawh ciang man uh ahihi. Tua makaite khahkhiat nangin, mualtung councilor Pu Vum Kho Hau in nakpi in panla in lawhcing kici ahihi.

Hibangteng i sutna ahang in, Burma Indepence pen i do khawm ahi, cih nopna ahihi. Tangthu ah Zogam ukpi te'n, Kawlmangte kiangah tokaina, siahtung siahphei apiaklam uh, koi mah ah kigelh omlo ahihi. Zogam pen 1898 kum CHRA tawh British te'n, official a, amau nuai ah hong koih masiah uh, independent gam khat i hihi. Ukpi teng in, Conbik pen President ding in, teel uh a, Conbik pen northern Zogam a ding in kumpi khat ahihi. Banghang hiam cih le, ukpi khempeu in Conbik pen siah piaciat uh ahihi. Manipur, Mizoram tan in siah pia uh ahihi. Conbik in Kawl Mang Thibaw kiangah siah pialo ahihmanin, Conbik pen kumpi taktak hi in, Zogam zong asuakta gam khat cihna hipah ahihi. Tuck and Carey gelh " The Chin Hills Gazetteer sung ah, simlam teng pen, independent villages in om uh hi cilai hi. Conbik vaihawmna nuai a, omlo teng zong, independent vilage dan mah uh hi pah ahihi. Naga te'n a tangthu uh agelh uh ciang, Bristishte lutma in, Nagate pen Sovereign Village ciat in kiding hi, acih uh tawh akibang ahihi. Tua mah siksan a, India tawh akiho uh ciang, muibun mahmah ahihi. Sovereignty i cih pen gam neu gam lian tawh kisai lo ahihi. Vatican pen khawta khat ahih hang Independent gam khat in, leitungbup in kipom ahihi.

Zogam in suakta tak a, ei le ei kivaihawm i hihlam pen, leitung in zong thei a, British te'n zong thei uh ahihmanin, Zogam uk nang in, CHRA cih constitution a tuam vilvel a, gelh uh ahihi. CHRA in Chin Hills, Mizoram, Naga Hills, Manipur Hills teng huam kha ahihi.

Galpi nihna hong bei ciangin, British empire hong thazawm ahihmanin, khutnuai sila gam teng, ukcip ding hong baih nawnlo ahihmanin, suahtakna piak ding hong kisam ahihi. Tua tawh kitonin, Zogam maban zong gelna khat nei uh ahihi.

Tua hunlai in, Zomi makai te'n zong, Burma tawh independence lakhawm leng, manlang ding ci in um uh a, , mualgam dang teng tawh kithukim uh ahihmanin, Panlong Thuciam ah na kihel uh ahihi. Panglong thuciam 5 na ah Zogam le mualgam te'n tualsung thuneihna neiciat ding ahihi, ci in Kawl le Zo kithukim ahihi.

Panglong siksan in, Kawl tawh suahtakna lakhawm ding cih pen, British te'n theician nuam uh ahihmanin, Frontier Area Commission of Enquery ci in, phuankhia uh ahihi. Tua FACE ah Zomi tangin kumpi nasem lak a, navak zawdeuh le mipuang pau thei Falam DC office a laitomkaih (stenograhpher) Pu Vum Kho Hau seh uh ahihi.

FACE mai ah Zogam thusun pen, Ukpite le palai tuamtuamte sung sak uh ahihi. Tua FACE commission in Zogam palaite athu dotna vuah, utdaan kician gen thei mel omlo uh ahihi. Federal deih maw? ci in adot uh ciang " Hi" cizel, Proper Burma nuai ah direct a lutnuam maw? acih uh ciang "Hi" ci zel, Independence gam tuam om nuam maw' ci a adong uh ciang lah " hi" cizel uh ahihi.Atawpna ciang Federal cihkhong, Unitary cih khong lai theilo kahih manun, telkei ung, ahizong in Zogam pen ko ngeina le ko kiuk daan in, tuam om nuam ung, ci tek uh ahihi. Federal deih ung ci a, siangtak a, gencian thei pen Major Mang Tung Nung bek om hi.Atawpna ciang in, thnutawp taktak ah bel laitheilote zong, khaw muzaw deuh te'n hilh cian hiding hi ven, Zomi le Zogam in Kawlgam tawh Federal thukhun zui in, kakipawl nuam uh hi, ci in, long khat hong kisuah thei uh ahihi.

FACE ah Zogam palai te'n Federal belpawl gam akideih mah bangin, Shan Kachin le Karenni (Kayah) te'n zong Federal mah deih uh ahihlam puangkhia uh ahihi. FACE muhkhiatna tungtawn in, Burma, Shanland, Kachinland, Karenniland le Zogam pen suahtakna piak khat suah ding in, British te'n khensat uh ahihi. Tua ahihmanin, 1948 kum a i ngah, Independence pen Panglong le FACE a Zomi le mualmi te thusun tawh kituak a, suahtakna kingah ahihi.

I gensa mah bangin, 1948 a kipan 1962 kikal democracy hunsung ah zong Zomi ten, tualvaihawmna kinei theilo ahihi. 1962 pan tukum 2011 dong mah tual vaihawmna kinei theilo nailo lai ahihi.1947 Constitution ah, Zogam government pen, Kawlmang in adeih bang lukiuh a seh ziauziau ahihi.1974 Constitution ah bel Zogam Government bek hilo in, vaihawmna khempeuh , Kawlmang in, adeihdeih un sehkhia piikpeek uh ahihi. 2008 Constitution ah zong, Zogam Kumpi ding pen, Kawlmang mah in, sehtawm ding cih ahihi.

Kawlmang thu akpi in phiatmai ci a, Zomi pupa te'n paunak aneih mah bang in, Kawlgam le Zogam in, suahtakna lak khawm lai a, thuciam i neih ahi, Panglong Thuciamte zuilo in, 1947, 1974, 2008 Constitution te ah vompi sahawm in, amau bek kipia uh a, Zomi le Zogam in Tualvaihawmna kinei thei nai tuanlo ahihmanin, 1948 independence gah zong, Zomi tangpi tangta in, tuni tan kilo kha lo cih ding ahihi.

Panglong siksan a kingah, Zomi Independence pen, agah i lawh khak taktak nang in, Zomi te'n zong akhangkhang in, i hanciam ahihi.

1961 kum Tuang Gyi Conference a CNO makai Pu Mang Tung Nung, Hill Chin Students Union makai Pu Chin Sian Thang, Pu Lun Pum, Pu Mang Tling, Chin Affairs Minister Pu Za Hre Lian te hanciamna.

1966 kum a Pu Tun Kho Pum ( Prime Minister), Pu Hrang Nawl (Foreign Minister), Pu Son Khaw Pau ( Defence Minister), Pu Son Cin Lian ( Chairman, Chin Affairs Council ), Pu Thual Zen ( Commander-in-Chief) te makaih United Chin Government panlakna.

1974 Constitution tungtanga, Zomi khangno Pu Chin Sian Thang, Pu Lian Uk, Pi Van Hnuai Tluai a kipan, Zomi makaite jail kiat loh lianga panlakna,

Pu William Sa Lian Zam makaih Chin Librationa Army.

Pu Pum Kap, Pu Cin Sian Thang te makaih Zomi National Congress

Pu CK Tai Kwel, Pu Ram Ling Hmung, Pu Lian Hmung te makaih Chin National Leaque for Democracy.

Pu Singpu, Pu Go Sawm Khup, Pu Zam Than Lian te makaih Zomi Students Union.

Pu Tial Khal, Pu Khaw Kim Thang, Pu Thomas Thangno, Pu Zing Cung te makaih Chin National Front.

Pu Hanglen, Pu PS Haokip te makaih Kuki National Organisation.

Pu Khai Za Song, Pu Thang Lian Pau, Pu Hang Sian Thang, Pu Kam Suan Thang te makaih Zomi Re-unification Organisation.

Atunga panlakna tengteng zong, Zomi te'n 1948 kum a pan, agah ilawh khak nailoh, suahtakna gah, i lawh thei nanga, panlakna vive ahihi.

Zomi le Zogam in 1948 kum a hong kipia, independence gah, i lawh zawh nang kihanciam, kihanciam laitak, kihanciam to lai ding ahihi. Indepence i laigil ( essence) taktak tawh Zogam kivaihawm theih nang pen. Panglong Thuciam 5 na ah siang tak in kigelhsa ahihi.

Tua ahihmanin, 1948 a Zomi le Kawlgam in independence ingah, agah lo khak taktak theih nang ngimna tawh kibawl ding, Second Panglong hong piang khiat theih nang a, ma hong la Zomi makai, Pu Chin Sian Than pen, World Zomi Congress in Zomi Independence Hero Award- ZIHA mipi tang a, piak ding kithukim ahihi.

Zomi, Kawl, le Non Burman gamte in, Panglong thulaigilte tawh kituak a, belpawl kivaihawmna taktak, hong piang khiat theih nang deihna le pahtawina tawh Independence cih kammal kizang ahihi. 1988 kum Aung San Suu Kyi mipi thugen masak penna ah zong '" Second Independence Movement " i neih kul ding hi, ci in, mipi gen a, mipi in zong thukim pah zuahzuah uh ahihi. Tua Shwedagon Speech a " Second Independence " tawh kisai speech hong neih a kipan, tunitan Kawl mipi makai hong suak zo ahihi. Tua bek tahmlo in, Burma Army fascist ci in, ngawh in, march kha 27 ni pen "Tatmadaw Day" in bawl nuamlo uh a, " Antifascism Day " in tuni tan bawllai uh ahihi.

Independence, Federal le Fascist cih kammal azat man a, kiman niloh hilo ahihi.Kawlgalkap in Kawlgam le mualgam teng,deksi a dawn thei nawnlo ding uh lau a, makaite man le khum den uh hizaw ahihi.

Tua ahihmanin, Panglong Khawmpi bawlkik a, gam le nam maban ding, zing vaihawmna ah, kuamah lungka lo a, thulaigil pomkip a ma ilak ciat ding ahihi.

Mipi lam pan zong ei khanga hong tung, hun thupi le poimawh ah, khang sawnsawn khualna tawh mala ciat ding in i kihanthawn ahihi.
Zo Khup
Coordinator,
WZCAC,
World Zomi Congress

Tual gal kipan kik

Dear Zomi u leh nau,

Kawlgam ah, Uital te in,thankik bang in athu uh lumlet suk/to ta mah leh ami kibang veve hi in, kiteelna abawl pongmawk uh hang,Vangak Utong kineih vive mah hong kahto kik uh a, UN leh leitung gam tuamtuam in amuanna ding peuhmah om lo tektek hi.

Tua kawmkal ah,Zomi te in, mimal angsung ding khawng peuh leh, sumpaai hang maw,min deihna hangmaw cih tawh, hih kawl Uitak te tawh nasemkhawm ding alunglut leh asemsem zong ih om ta hi.

Tuni in, Ih Beh te ahi, Kachin KIA galkap te leh Kawl galkap te ki kap tuah ta uh a, hihthu pen, meikuang bang in hong kuang kik ding lam et omzaw hi. A beisa DKBA te hong dinkhiat na thu nisim ih theih tek hi a, KNU tawh hong ki pawl thei ziau in, ASSK leh mualtung mite tawh second panglong a ki bawlsiang masiah hih tualngal bei pak nawn lo ding hi.( Na up keileh na en cik mah in )

KIA te pen galkap thei sisen 25000 val nei uh a, galvan hau in, sum leh pai zong ki tasam lo uh hi. Tua mah bang in, Wa minam ( UWSA ) te leuleu zong, galkap galdo thei sinsen 35000 val pha uh hi. Kachin te leh Wa te pen, vom acih uh leh vom aci tuak hi a, Revolutionary akipat tung in,Burma Communish Party sung ah aomkhawm vive ahi uh hi. Wa makai sung ah Kachin te tampi om in, atawntung in kizom den uh hi.

Hih Behte ahi Kachin army leh kawl uital nautang te hong kikap na hang in, Wa ( UWSA ) te hong lawh ding a,SSA te leh Kayan te hong kilawh suak in,Taungkyi kuam a om, Pa-oh minam te tawh zong hong ki zom suak lai dinghi.

Kawl galkap thau tawi galdo thei taktak pen, 70000 val deuh ahih leh tampen ding hi.Kumpi nasem khempeuh tawh a gawmciang bek in, 500000 ( Sang nga ) khawngbek ahihi.Mualtung mi galvan tawi galdo thei khempeuh kigawm leh 130000( sang khat leh then thum) kim bang pha ding a, abeisa 1989 kum akipan, Cease Fire ( kido khawlna ) aneih uh pen, Kachin ,Wa leh SSA North te ahi a, atha nem SSA-N te zawh tawh bawl mahmah uh hi.

Kachin leh Wa tawh hong ki nuai hun ciang in, nasia mahmah ding a, tua thu khempeuh second panglong thu kikupna bek in, hong lemzo ding hi.Tua ahihman in, Zomi te in, tua hun hong tun ma in,bang cibang in, kalsuan in, mapang in, ih minam ih gam suahtak nading leh ih generation khang tampi en kawm in, ih vaihawm ih ngel ding hong kisam ta hi.

Veina bek tawh, mimal muhna pan,

http://www.kachinnews.com/news/1849-fighting-begins-between-kachin-and-burmese-armies-in-northern-burma.html

--

Burma army retreats and says no order given to enter KIA territory

Burmese troops have retreated after being attacked by the Kachin Independence Army (KIA) last evening in Kachin State, northern Burma, sources from the front said.

The Burmese troops are from four battalions under the Northern Regional Command--- Light Infantry Battalion (LIB) No. 437, based in N’Mawk (Momauk) , LIB No. 319, based in Man Je (Mansi), the Mohnyin-based Infantry Battalion (IB) No. 15 and Myitkyina-based IB No. 21, according to local KIA sources.
kia_soldier

A KIA soldier in the fronline in Bhamo district in Kachin State. Photo: Kachin News Group


A joint-force of KIA soldiers and the Civilian Defense Force, Battalion No. 27, commanded by Major Yaw Htung, attacked a truckload of Burmese troops from IB No. 15 yesterday morning near Pungling Village, Man Win Township, in Manmaw (Bhamo) district, after Burmese troops entered the KIA’s restricted area.

The Burmese battalion commander, Lt-Col Yin Htwe, was killed and seven troops were injured in the attack.

A medical doctor was also seriously wounded according to KIA sources. He died while being transported from Nam Hkam Public Hospital to a hospital in Ruili (Shweli), the Chinese border trade city in the country’s southwestern Yunnan province, KIA sources said.

Currently, five injured soldiers are hospitalized in Muse public Hospital, in Northern Shan State, hospital sources said.

A KIA civilian fighter was also killed in an accident in the area of the fighting about 4 p.m. yesterday, said KIA officers.

KIA sources also said Brig-Gen Zeyar Aung, commander of Northern Regional Command, based in the Kachin capital, Myitkyina, told the KIA that he did not order the troops to enter KIA territory, but that the intrusion was an accident.

The KIA said it had to use force because the Burmese troops entered the controlled area after ignoring the KIA’s warning.

The Dai Lawn Rung, military command headquarters of the KIA, granted “permission to shoot” to all KIA troops in Kachin State and Northern Shan State, if Burmese troops enter KIA territory, according to KIA officers.

The KIA officials said the fighting will escalate if the Burmese junta sends its troops to the frontlines.