This is America

DEMOCRACY

http://en.wikipedia.org/wiki/Democracy

Leitung ah mihing te kiukna leh zalen nading in, Democracy kiukna thukhun a hoih pen hiding hi ci-in, atamzaw in lamen ciat uh hi.Pasian in zong ateltuam Israel minam te hunkhat lai in, ama deihbang bek asem abawl azui ding in,deih ahihman in, athu khun te a mangnuam lo te, mei leh kaat tawh haltum ahizong, Lei in nawmvailhsak ahihzong, huihpi in nawkmangsak ahizong, tuihualpi tawh nawkkhia ahizong gimna namkim tawh amite panpih leh thuhilh na in nanei hi. A hizong Pasian in leitung mikhempeuh aitna Planing khel in, ait mahmah leitung mite gumkhia tankhia ding in, atapa neih sun Jesu eite tanding a, hong sihzawh akipan, mihing khempeuh in sia leh pha khentel theihna nei in,asia bawl ten asiatna bang , apha bawl ten apha bawlna bangbang in huntawpni teh thukhen pan ding hi.

Pasian in nidang hunbang in thukhun leh thukham te tawh direct in mihing te gawt pahpah nawn lo a, amau utbang ciat in gamta sakta hi.Tua ahihman in, suakta tak in paukhiatna,gamtatna,uptheihna,atkhiattheihna,zontheihna,bawltawm theihna, athak bawlna cihbang in mihing te Freedom and Choice na pia hi.Tua pen Democracy ahihi.

BURMA INDEPENDENCE

https://www.cia.gov/library/publications/the-world-factbook/geos/bm.html

Kawlgam pen January 4,1948 kum in,British kumpi te kiang pan suahtakna nangah in mualtung mite tawh kigawm khawm in Union Of Burma minpua in Democracy ukna tawh ki uk hi. March 2, 1962 kum in http://en.wikipedia.org/wiki/Ne_Win U Ni Win in, kawlgambup thuneihna amakhutsung ah koih ahihman in mipi te lungkim lohna leh mualtung mi te langpan na tuni dong ki tawlnga nailo hi.

1988 kum in sangnaupang te makai in, gambup mipi te in lungphona bawl uh a, thunem tawh vaisai lo in, thauvui thautang leh sisan luanna tawh vaisai uh ahihman in, kawlgam in Democracy ngahzolo hi. 1990 kum in gambup Democracy tawh kiukna ding in, mihing dendan omlo,suakta tak in Party bawltheihna om a, Zogam pan ZNC mintawh zong Tedim gam pan Pu Chin Sian Thang leh Tonzang gampan in Pu Thang Lian Pau te in MP hongngah uh hi. Gambup ah NLD party in gualzawh hong ngah himah leh Galkap uital te in, thuneihna pia nuam lo in, tunidong ciang NLD party abei nading leh amau thuneihna nuai ah leitung akhangto minam gamte nungngat in gamta denlai uhhi.

Zomi leh Democracy

Kawl galkap Uital SPDC te khut sung pan akhangkia Zogam a teng Zomi te tampitak nuntak hamsatna hang in gampua ah kizin khia a, USA mahmah ah zong tampi kitung ta hi. A hizong in, gampua atung Zomi te pawlkhat in SPDC kawl uital te lungsim pua denlai uh a, ih tuna Democracy gam thukhun te theikha lo uh hi.Na khempeuh asiam pen apil pen a theipen hi nuam den lai Zomi tampitak om hi.Kawlgam ah SPDC khutnuai pan ihsuahtak zawh ciang, ih lungsim te zaisak in Democracy lungsim, mikhempeuh akibang hi.Minam lian minam neu omlo,leitung ah mihing ciatciat,liangko kikal ah lutang khat neitek cih ihphawk ding kisam hi.

SPDC in kawlgam ah, amau bek in, thunei ding, amau cih bek kimang ding, amaubek in ukcipding nakhempeuh amau control ding cih lungsim nei uh ahihman in asung aom mikhempeuh in langpan uh hi.Suahtakna omlo leh khantohna omlo ahihman in langpan ding mah ahihi.

Leitung ah gam khangtopen te Democracy kiukna tawh kiuk uh a, asung ah minam namkim, pau namkim leh kipawlna namkim tawh om dimdiam uh hi. Democracy gam ah Party khat bek in thuneihna omlo a, mihing khempeuh in suakta tak in Party phuankhia bawlkhia thei hi.Suakta tak in laigelh thei in, suaktatak in genkhia thei, semkhia thei, bawlkhai thei uh hi.Suahtakna gam ih cih in, Democracy gam cihna ahihi.

Tua ahihman in ei Zomi te pawlkhat in suahtakna Democracy gam ah teng in, khuasa in aom uhhang, alungsim uh, SPDC khaicivawhte tengden lai in,suakta thei mahmah lo a, Kawl Uital te sikkhau in hencip lai mawk hi.Tua bang lungsim te tuhun ah date out ta in, expire khinta hi.Khangthak Zomi te in akiukcip gampan ihsuahtakna,te zangsiam in, minam tuamtuam te, ih minam kibat pih te tawh kipumkhat thei in, kipawl khawm thei in nasemkhawm thei ih hihtheih nading ihlungsim te Tem bang in tathiam dending kisam hi.

Tu’n ih tunna USA gam hi. Democracy kiukna ahihi. Ih lungsim te suakta sak in,zaisak ding hihang. Suahtakna ihzatsiam kei leh ei mimal mahmah asum ih hihi. Suakta tak in laiat thei, pawlphuan thei, paukhia thei,semkhia thei ih hihman in ihsuahtakna Freedom te zangsiam ni. Suahtakna adeihlo aukcipnuam, acontrol nuam ,alangpan nuam te kawlgam ah ciahkik leh apawl ding uh omding a, nuamsa mahmah ding uh hi.

Ahizong in suahtakna theipong na pi azangthei mahmah lo leh atel thei mahmah lo mite bangcibang in kipawlpihding ihhhiam cih zong ngaihsut ding khat hong hi leuleu hi. Naupang muamkhum duhte zasan ih piak leh lungkim hetlo ding ahihman in aduhbang in ihpiak khit ciang hongkhan tohna tawh kizui in lampi man hilhcian theiding hang…

Ih Zomi mite ih it takpi leh lungsim meima nei te, aliatma in,khangthak te in,zatui hoih te nuhsak dending kisam mahmah hi.Tuabang lungsim meima neite hong khangkhang in hong lian semsem thei ahihman in ih minam sung ah meima pi hong suakthei hi.

Zomi ih hih leh ih mipih te tawh kipawl theihding hanciam ni.

Zogam , Manipur gam, Mizogam leh Chattagong a om ih mite Zomi mah hi cihtheihding han ciam ni.

Zomi ih thupit saknop leh ihsanggam dang te tawh kipawl in amau pau leh ham zong siam sawm ni.

Zomi ahilo , Kawlmi, Senmi, Vai mi, Mivom mi, Kikang mi khempeuh namdang mi hi,ih cihtheih mahbang in etpi tuam minam leh et neu tuam minam nei kei ni.

Zomi ahih kei leh namdang te avom, asan, akang, aeng, apuang philphel khempeuh Namdang mihi cih sang siam ni.

Gentehna in, Kawl te mu dah mahmah in, mikang te sente peuh enpi cih zong ihlungsim tuampai na khat ahihi. Namdang mi ahih leh namdang mi hi cih pom theihsawm ni.Mikang te in ihgam hong phelkhap uh a, etpi ding hipeuhmah lo hi. Kawl te in bel Mikang te bangliang in ih gam hong nawngkaisak naisam lo uh a, Mikang te sang in kawlte ithuai zaw lai hi.

Sihtan theihding

Nang’ nasep nabawl zawh kei leh mi asem abawl te gensia sedah in.

Mikhut tawh gul man nuam kei in.

Nautang kician dinmun theilo pi in, Makai khawng utse dah in.

Nang thu bek thusa lo in, mite lungsim ah bangom cih ngaihsut masak in nei in.

Thuman na sak te amanbang in pompah thei lel in, na khialhna te kisik thei in.

Na kum tawh kituak in kampau inla, thu hong kidot luat kei leh om hithiat lel in.

Ih kipilsak luatnop a, mi thudot ding ih utluat nop a, makai khawng ih utluat leh mite in ahai in hong muding hi cih phawk in.

Mi khat peuh ii upna, biakna, kipawlna,gamatna, kampau nate,sai nuam se dah in.

Na ta te pilding na deih leh ciangduai tawh sat kei in la, awkhum tawh na deihbang in thuhilh kamkum khawm in.Tua hi leh na tate in, ka pa mipil hi.mi muan huai hi ci-in, amailam kalsuan zia ding te hong kuppih in, hong seppih ding hi cih phawk in.

Herod kumpipa in, amah kumpiza asuankhia ding alauhluat man in Jesu suahding thu azak pan in, naungek khempeuh athahmang bang in, mikhat peuh nasepna, kipawlna khat peuh nasepna te beimang na ding na ngaihsut khak leh Pasian in nang hong dawn hetloding cih phawk in.

This is America…..Democracy…. Freedom

Topa’n telsiamna kikhelsiam nate hong pia kimciat ta hen….

Ngaihsutna tuamtuam leh tuakkhak na tuamtuam pan,

Tg. Zogam Mungno