Khan toh nang lampi

KA OMMUAN KHAWM KA NGAIH SUTSUT THU TE

EI MA THA TAWH EI

Nang pen kuamah in asang penpen na mun ah khau tawh hong domzo denlo ding a, hong domto zo om zenzen mahmah leh zong sawtvei hong domto zolo ding ahihman in anuai ah kia sukkik veve ding hi teh. Ahizong in, ei ma khe tung mah ah ding in, kal khat khit kal khat suan toto leng leitung a mual sangpen tung dawn zong ki tung zo ding hi.

HOIH LENG ZONG EI, SIA LENG ZONG EI

Mihing te in ngeelna kineiciat a,ahoih ngeel na zong kinei in, ahoih khempeuh zong tangtung pahpah lo hi. Asia zong khat veivei kingeel thei kha zeel hi. A hoih in ih khan toh nop leh khantoh theihna ngimnam lampi ngeel in kalsuan ding ahihi.Ih theih gige ih siamna ih talent khat tawh zonsiam na, ngeel siam na, tupna ngiim na nei in, ih lungsim khensatna bang in ih kaal suan leh a gualzo ding ih hihi.

A MAWKNA BANGMAH KI NGAH LO

Na gualzawh na ding leh na lungsim nopna ding in, nang leh nang na kibawl bangbang ngah thei ding hi teh. Leitung in nang pen amawkna in bang mah hong pia lo ding hi, Tua bek hilo in, mi khat peuhpeuh in, na kiang ah hong pai in, na liang hong beng kheuhkheuh kawm in,“ Heouh!!!!!! jiah na deihteng la ooh “ ci-in, kuaman hong pia ngeilo ding hi.

Tua ahih kei leh !!! na nungpan na liang hong beeng kheuhkheuh ding a, na etvat teh, na biang buk savat in hong tup khit ciang, hih hi ei amawkna nangah ding akilawm cih te pawl bek omthei hi.Hih atung athu te mi khempeuh in zong thei in,ngaihsun thei na pi,Tua pa in, tua nu in hong huh kei leh keibel bangmah sem zo kei ning, ka sumbawl nop ki pan zo kei ning cihbang in,ki ngaihsun thei zel hi.

Tua pen khialhna lian pi hi gige hi.

Tua ahihman in mi khat peuh in, nang mailam ding bangmah hong sepsak theilo ahih leh nakhan tohnop a, na gualzawh nop leh na pianpih siamna pilna theihna te zangkhia in,hanciam in, kalsuan le cin, mi gualzo suak pan ding hi teh. Ei leh ei kimuanna neih masak ding thupi mahmah a, ih siamna nate zatsiam ding thupi mahmah hi.Gualzawhna in nangma tung ah om gige cih phawkden in.

MI IN HONG HUHZONG IN, HONG HUH KEIPHIAL ZONG IN

Mihing in ihpian tung in, hong kem hong khoi ding om in, ih gol khit ciang in,ih kim ih paam ah hong panpih ding a om kei zong lung kia kei in.Na khualzinna hih leitung ah gualzawhna in nang hong ngak gige cih phawkden in. Khat veivei, kei” hiciang bek mah tawh anungta a khuasa ding mah ka hiam ci in, kingaihsun in, ki huisa thei mah hi.Zogam taangpaal na hihna tawh launai kei in, lungkiatna ding om peuhmah lo hi.Na mai ah nang tawh akituak nasep theih nabawl theih na tampi om a, na zondan leh azawi na muhna kisam lai cih bek ahihi.

Midang te’n lungkiatna ding hong genpih teh na lungsim ah guang kha kei in. Kei ‘ mimawkmawk ding hi zenzen keng cih lungtang pua in.Na kiim na paam pan hong phat ding hong thapia ding aom keizong in, awlmawh nai kei in.

Athupi pen ah “”””” Nang mah leh nang mah na dinzawh ding hanciam ding bek “””” ahihi.Ei leh ei dinkipzawh nang lungtang,kimuannang khensatna ih neih khit teh ihmailam kalsuan zia ding te gual zopan ding hi hang…

MAKAI

Hong pahtawi ding, hong phat ding mi kisam masa lo a,maikai muanhuai makai hoih ih neih ding bel mikhempeuh in kisam leuleu hi.

MI PHAT SIAM TE

Na sepna mun khat peuhpeuh ah, ih khut nuai a nasem ih neih te asepna ah akhialhna ih muhte a gen pahpah leh atawng pahpah ih hihsang in, asepna bawlna ah ahoih apha abawlkhak sunsun te pahtawi siam in phat siam leng nasem hoih nasem muanhuai ahihtheihna ding apantah ih hihmahbang in,ei mahmah zong mite in makai hoih khat in hong itding a, hong zakta ding hi.

Mi phat siamna, kamsiam na in ,numei naupang ulian Pu teek, Pi teek khenlo in, mikhempeuh in zadah hetlo hi.

CIH TAK NA

A citak lo te cikmah in makai suakngeilo hi. Thukhual in, mailam saupi enkawm mukawm in cihtakna tawh akalsuan te bek makai suakzo pan hi.

A MUN LEH MUAL ZUI A, THU GEN SIAMNA

A mun leh mual tawh ki tuak in gending akilawm leh phatding akilawm te ih zatsiam leh lawm leh gual lak sumzon paai zon na mun te ah zong agualzo mi kihi thei hi.

THA PIAKNA

Mi khat peuh ahihna bang, asiamna bang in tha ihpiakkhak ciang in,a ma ading lungsim khauhna leh taksa dimna ahihman in thapiakdan ih siam mahmah ding kisam hi.

Zoplai ding……